Governu fasilita tratamentu masal ba labarik ho defisiénsia iha ALMA

DILI, 13 Agostu (TATOLI)—Governu liuhusi Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Abitasaun Rurál, Ministériu Saúde, Ministériu Solidariedade Sosiál no Inkluzaun fasilita tratamentu masal ba labarik sira-ne’ebé mak ho kondisaun defisiénsia iha Konventu Madre Asosiasi Lambaga Mesisonaris Awam (ALMA).

Vise Primeiru-Ministru, Mariano Assanami Sabino informa ohin ne’e simbolikamente Governu hakarak mai iha fatin ne’e, maibé iha fatin sira balun hanesan área rurál no munisípiu sira, ne’e Ministériu Solidaridade Sosiál no Inkluzaun sempre to’o iha ne’ebá hodi haree.

“Maibé ohin Governu vizita iha-ne’e ita hakarak iha link ho doutór sira para fó asisténsia kontinua iha-ne’e. Ita mak husu nafatin ba inan-aman sira fó nafatin fó domin, nafatin hakuak sira, durante sira-nia moris tomak,”Assanami dehan ba jonalista sira hafoin halo vizita ba Rezidénsia Madre ALMA, Praia dos Coqueiros, Dili, Kinta ne’e.

Nia dehan Governu mós apresia Madre ALMA sira tanba husi sira-nia prezensa iha-ne’e bele iha esperansa boot ba madre sira para bele kontinua tau-matan ba oan sira.

“Ita apresia ba doutór sira, tanba doutór sira bele mai fó konsulta jerál iha semana-semana. Iha Domingu ka Sábadu mai vizita oras ida ka rua saida mak falta, la’ós iha-ne’e de’it maibé ospitál iha munisípiu no klínika sira ita sei organiza mós sira espesífiku halo vizita ba ida-ne’e,” Mariano tenik.

Iha fatin hanesan, Reprezentante Madre ALMA, Justina Santos, hateten ohin loron Irma ALMA sente agradese tebes-tebes tanba labarik sira-ne’ebé mak durante iha Konventu Madre ALMA.

“Sira-ne’ebé mak ho ami iha-ne’e sira hetan atendimentu maibé sira-ne’ebé mak hamutuk ho inan-aman sira ami ba halo vizita halo terapia iha uma, ne’ebé ida-ne’e oportunidade di’ak tebes mai ami halibur, maibé konsege balun la mai tanba ho situasaun,” Reprezentante Madre ALMA Justina Santos informa.

Nia dehan labarik ne’e mak durante iha hela ho madre sira iha konventu hamutuk na’in-19 maibé ida daudaun ne’e hetan tratamentu ne’e hamutuk na’in-25 inklui ho estudante iha eskola ALMA.

Nia haktuir konsulta ne’ebé mak hala’o husi Governu ne’e ba labarik sira-ne’ebé mak kondisaun defisiénsia iha Madre Alma ne’e foin primeiravéz.

“Konsulta ne’e primeiru. Ami la husu maibé Vise Primeiru-Ministru nian sempre mai dala hirak ona iha-ne’e. Nia mai halo tinan no misa hamutuk iha-ne’e ne’ebé nia hatene, no nia rasik mak haruka nia membru sira mai fó hatene atu prepara labarik sira,” Madre Justina haktuir.

Jornalista: Osória Marques

Editór: Xisto Freitas da Piedade