Governu kontinua esforsu atu hadi’a sistema saúde iha Timor-Leste
DILI, 13 Agostu 2026 (TATOLI)–Vise-Primeiru-Ministru no Ministru Koordenadór Asuntu Sosiál, Mariano Assanami Sabino, hateten Governu kontinua esforsu atu hadi’a sistema saúde sira iha Timor-Leste, nune’e povu kontinua fó konfiansa ba fasilidade saúde sira hodi ba halo tratamentu saúde.
“Ha’u orienta hela ho Ministériu Saúde tanba Ministériu Saúde mak iha kompeténsia liu atu haree oinsá mak saúde bele la’o ho di’ak. Maibé ita esforsu atu ita-nia ospitál tenke sai fali konfiansa ba ita-nia inan-aman sira atu ba iha ne’eba nomós sai fatin salva ema-nia vida,” Mariano Assanami Sabino hateten ba jornalista sira iha Pantai Kelapa, ohin.
Nia informa, nu’udár Ministru koordenadór sempre orienta nafatin ba iha Ministériu Saúde no agora iha ona konkordánsia oinsá atu rezolve problema saúde sira iha Timor-Leste.
“Operasaun sira ne’ebé kiik bele la’o nafatin hela mais ida ne’ebé ke todan ne’e ita tenke haruka ba rai li’ur tanba ita kondisaun seidauk bele, maibé agora dadaun orsamentu ha’u husu ona, atu maizumenus ita bele la’o dadauk ona. Prontu situasaun mak ita-boot sira haree, la’o seidauk ho di’ak mais nu’udár Vise Koordenadór ha’u sempre orienta no esforsu atu la’o di’ak nafatin,” nia dehan.
Nia esplika, Governu iha ona planu atu tau orsamentu boot ba setór saúde iha tinan oin tanba ema mak futuru nasaun nia.
Jornalista : Felicidade Ximenes
Editór : Cancio Ximenes
