Governu sei integra sistema dijitalizasaun iha prosesu aprovizionamentu
DILI, 13 Agostu 2026 (TATOLI)—Primeiru-Ministru, Kay Rala Xanana Gusmão, hateten iha tinan oin laiha tan ona asinatura ba dokumentu konkursu públiku ba projetu ruma, tanba Governu sei integra sistema dijitalizasaun iha prosesu aprovizionamentu.
“Entaun, ho ida-ne’e mak sei iha mós pra-kualifikasaun ba empreza sira hotu, nune’e sei la indika ona maibé ita ida-idak mak sei haree tuir klasifikasaun ne’ebé iha,” PM Xanana hateten iha ninia diskursu bainhira hala’o sorumutu ho emperzáriu sira iha salaun Delta Nova, ohin.
Xefe Governu dehan, atu nune’e ema hotu bele hatene katak empreza ida-ne’e iha ekipamentu no esperiénsia se lae mai atu asina de’it dokumentu depois la ezekuta servisu ho di’ak, entaun sei laiha tan konsiderasaun (ajudikasaun) maibé tenke haree ida-idak nia klasifikasaun.
“Tanba ne’e dijitalizasaun prosesu aprovizionamentu ne’e importante tebes hodi garante imparsialidade no dezempeñu servisu iha terrenu,” nia esplika.
Iha fatin hanesan, Diretór Komisaun Nasionál Aprovizionamentu, Hermingardo Albano Soares, hateten kona-ba prosesu dijitalizasaun aprovizionamentu ne’e integra husi Ministériu Finansa la’ós CNA.
“Prosesu hotu elabora husi M, no daudaun ne’e iha prosesu sosializasaun. Bainhira estabelese ona sistema dijitalizasaun ne’e, CNA sei la’o tuir sistema ne’e rasik,” nia dehan.
Iha biban ne’e mós tuir Jestora empreza Lumaper Rululi Unipesoál, Lda, Madalena Pereira Carlos, hateten integrasaun dijitál iha prosesu aprovizionamentu ne’e kapaas tebes tanba bele fasilita servisu hotu ho transparánsia bazeia ba kualifikasaun hanesan materiál no esperiénsia kompañia ida-nian.
“Entaun asaun ida konsiderasaun (ajudikasaun) ho asinatura de’it ne’e sei la limite ona iha prosesu aprovizionamentu. Tanba ne’e sei fó dalan ba kompañia hotu atu kompete hodi ezekuta servisu ho di’ak no garante nafatin konfiansa husi Governu, se lae fó de’it maibé rezultadu laiha,” nia dehan.
Jornalista : Alexandra da Costa
Editór : Cancio Ximenes
