Komemorasaun loron FALINTIL ba dala-51 iha Foho-Matebian nu’udar jestu memoriza luta ba libertasaun
DILI, 13 Agostu 2026 (TATOLI)—Xefe Estadu Maiór Jenerál Forsa Armada (XEMGFA), Tenente Jenerál Falur Domingos Raul ‘Falur Rate Laek’, hateten, komemorasaun loron Forsa Armada Libertasaun Nasionál (FALINTIL) tinan ne’e ba dala-51 sei halo iha foho Matebian hodi fó ondra ba mártir sira.
“Iha jornada naruk ida-ne’e nia rohan, Foho-Matebian, foho lulik nasaun Timor nian sei hatudu-an. Iha ne’ebá, iha tempu pasadu, ema rihun ba rihun hetan refújiu no fatin esperansa nian, iha ne’ebá mós pájina ida-ne’ebé maka todan liuhusi ita-nia jornada luta libertasaun nian. Refújiu no trajédia koeziste. Tanba ne’e, iha foho ida-ne’e hanesan sofrimentu no reziliénsia koeziste iha povu timoroan tomak nia klamar,” Jenerál Falur hateten iha nia intervensaun bainhira prezide Marsa FALINTIL hodi komemora loron FALINTIL ba dala-51 ne’ebé hala’o iha Kuartel Jenerál F-FDTL, Fatuhada, Kinta ne’e.
Notísia relevante : MAKLN-CCLN sei mobiliza kombatente kada munisípiu partisipa iha Komemorasaun Loron FALINTIL ba da-51
Falur dehan, komemorasaun loron istóriku ne’e ho tema “Onra ba Mártir sira, Kompromisu ba Estabilidade no Dame”.
” Fó onra ba mártir sira la’ós jestu simples nostaljia nian. Nu’udar devér memória ativa, neʼebé impoin ba jerasaun atuál responsabilidade solene atu salvaguarda buat ne’ebé husik hela mai ita, mak soberania no pás,” nia akresenta.
Nune’e, Jenerál Falur konvida sidadaun hotu iha ámbitu loron FALINTIL ba dala-51 atu halo reflesaun.
“Iha kualidade ida-ne’e, ha’u konvida ita-boot sira no foin-sa’e sira hotu neʼebé prezente atu halo reflesaun tuir dalan, kona-ba ita-nia kapasidade atu reziste,” nia katak.
Iha biban ne’e, nia mós husu ba veteranu sira atu hamutuk ho populasaun hotu atu fó ondra ba mártir sira iha loron istóriku ne’e.
“Mai ita kontinua, unidu, veteranu no foin-sa’e sira, ho farda no moxila estudante nian, bá Matebian, ho serteza katak ita fó onra di’ak liu ba mártir sira bainhira ita harii, ho ita-nia liman rasik, dame no estabilidade ne’ebé sira luta hodi husik hela,” nia tenik.
Jornalista : Natalino Costa
Editora : Julia Chatarina
