Preparasaun Selebrasaun Loron FALINTIL ba da-51 iha progresu
BAUKAU, 13 Agostu 2026 (TATOLI)—Prosesu preparasaun ba Selebrasaun Loron Nasionál Forsa Armada Libertasaun Nasionál Timor-Leste (FALINTIL-sigla portugeza) iha Suku Abu, Postu Administrativu Matebian atualmente atinje ona pursentu 50-resin.
Administradór Postu Administrativu Matebian, Domingos Pereira, esplika prosesu preparasaun selebrasaun loron FALINTIL ba da-51 parte autoridade lokál apoia mobiliza komunidade hodi hamutuk ho komisaun organizadora hanesan membru FALINTIL-FDTL inklui ministériu relevante hodi prepara fatin ba isár bandeira ne’ebé atinje ona pursentu 50 resin iha-ne’ebé sei realiza iha área Sobasula, Kinta (20/08/2026).
“Ami nu’udár postu foun kontente ho selebrasaun ida-ne’e, tanba sei partisipa husi governante no bele haree direta ami-nia difikuldade no situasaun ne’ebé mak postu infrenta,” Domingos Perreia hateten iha Vila nova, Kinta ne’e.
Líder lokál ne’e relata mezmu la envolve direta husi Komisaun Organizadora maibé autoridade postu iha área foho Matebian hanesan postu tolu kompostu husi Kelikai, Kelikai Antigu no Matebian koordena hodi mobiliza komunidade kontribui ba selebrasaun loron istóriku referidu ho susesu hanesan, foti fatuk no ateru ba rai kuak sira no prepara ai ba fatin bainaka sira atu túr inklui fatin diskursu nian.
Aleinde ne’e, parte seluk hala’o husi Institutu Jestaun Ekipamentus (IGE-sigla ingleza) ne’ebé kontinua prepara ateru estrada hodi iha kondisaun ba movimentasaun transporte ho distánsia kilómetru haat (4) resin kobre husi Suku Laisorulai to’o Abo-Lir.
“La’os ami Autoridade de’it maibé inklui mós komunidade sira hamutuk ho ita-nia forsa halo servisu iha-ne’e,” Domingos informa.
Domingos Pereira konsidera selebrasaun loron FALINTIL sai oportunidade ba komunidade tanba fó rendimentu ba komunidade ne’ebé sei fa’an sira-nia produtu lokál iha fatin serimónia.
Entretantu, prosesu preparasaun ba selebrasaun loron nasionál FALINTIL ba da-51 iha Abo, Postu Administrativu Matebian hahú ho serimónia husu lisesnsa iha loron 16 Jullu ne’ebé hala’o direta husi lia-na’in no uma-lisan hamutuk sanulu (10)-resin ne’ebé rezulta naan-aten hatudu sinál pozitivu no partisipa husi dirijente administrasaun munisipál, postu, suku, lian-na’in no komunidade.
Jornalista: Natalino Belo
Editór: Xisto Freitas da Piedade
