Tinan 2026, ADN rejista projetu abandonadu iha territóriu hamutuk 56
DILI, 13 Agostu 2026 (TATOLI)—Ajénsia Dezenvolvimentu Nasionál (ADN), iha tinan 2026 ne’e, identifika projetu abandonadu iha territóriu hamutuk 56.
Diretór Ezekutivu Ajénsia Dezenvolvimentu Nasionál, Januário Guterres, hateten totál projetu ne’ebé abandonadu totál ne’e sira rejista hamutuk 56, kompostu husi Aileu 10, Ainaru ida (1), Baukau sia (9), Bobonaru tolu (3), Kovalima tolu (3), Dili tolu (3), Ermera rua (2), Lautein tolu (3), Líkisá rua (2), Manatutu rua (2), RAEOA tolu (3) no Víkeke 11.
“Projetu hirak-ne’ebé ita-nia setór privadu sira abandona ne’e tanba kestaun rua mak problema kapasidade finanseira no jestaun jestaun internál nian,” Diretór ADN ne’e informa ba jornalista sira iha salaun Delta Nova, ohin.
Dirijente ne’e hatutan, aleinde abandona projetu sira-ne’ebé mak iha progresu ba implementasaun projetu sira-ne’e hamutuk 1354 no projetu ne’ebé mak finalizadu hamutuk 407.
“Projetu ne’ebé progresivu ona ne’e tanba setór privadu barak mak servisu ho kualidade no iha kontrolu ne’ebé másimu husi Governu, aleinde ne’e iha tinan 2025 Governu minimiza konsultór estranjeiru hodi fó biban ba enjineiru timoroan,” nia esplika.
Enkuantu, nia dehan, projetu ne’ebé iha faze preparasaun Estudu, dezeñu no aprovizionamentu iha tinan 2026 ne’e hamutuk 786 ne’e barak liu projetu infraestrutura.
Jornalista : Alexandra da Costa
Editór : Cancio Ximenes
