Xanana husu setór privadu labele halo manobra hasa’e presu materiál konstrusaun
DILI, 13 Agostu 2026 (TATOLI)—Primeiru-Ministru, Kay Rala Xanana Gusmão, husu ba setór provadu sira-ne’ebé implementa servisu infraestrutura ne’e tenke onestu no labele halo manobra (bosok) hasa’e presu materiál konstrusaun iha ámbitu funu médiu oriente.
“Hanesan ita hotu hatene katak funu iha médiu oriente fó impaktu tebes ba presu materiál konstrusaun hanesan alkatraun no kombustível, maibé setór privadu sira tenke iha onestidade no labele uza oportunidade ne’e hanesan kesempatan dalam kesempitan,” Primeiru-Ministru, Kay Rala Xanana Gusmão, apela ba emperáriu sira iha sorumutu ho setór privadu sira iha salaun Delta Nova, ohin.
PM Xanana dehan, ho presu ne’ebé la razoável dalaruma bele impaktu ba atividade infraestrutura nian liuliu projetu balun la’o demora.
“Tanba ne’e ha’u husu ba ADN no MOP atu ajusta presu materiál konstrusaun nian hodi halo avaliasaun hamutuk, atu nune’e projetu hotu bele kontinua la’o,” Xefe Governu apela.
Ministru Obra Públika, Samuel Marçal, hateten ho problema presu alkatraun no kombustível sa’e ne’e mak ohin sira konvoka sorumutu hodi rona preokupasaun husi setór privadu sira.
“Setór privadu sira mak tenke relata sira-nia problema ne’e, karik afeta duni ka lae, hotu tiha mak ami sei halo relatóriu ida lori aprezenta ba Konsellu Ministru atu kria rezolusaun ruma hodi hadi’ak problema refere,” nia dehan.
Diretór Ezekutivu Ajénsia Dezenvolvimentu Nasionál, Januário Guterres, hateten servisu ida-ne’e agora la’o hela entre ADN no CCITL ne’ebé sei halo ajustamentu ba presu materiál konstrusaun nian.
“Ami halo hela koordenasaun ho CCITL atu ami rekolla dadus, nune’e ami bele halo fali ezersísiu ba presu materiál konstrusaun sira tamba alkatraun durante ne’e ami sosa iha Dubai, Singapura no Indonézia, enkuantu nia stoké sei iha maibé presu mak sa’e,” nia informa.
Enkuantu presu mundiál ba alkatraun kada tonelada ida hetan presu $130.000 to’o $134.000.
Jornalista : Alexandra da Costa
Editór : Cancio Ximenes
