Bankada PD hakarak ko’alia ho CNRT kona-ba kandidatu komisáriu CNE
DILI, 14 Agostu 2026 (TATOLI)-Bankada Partidu Demokrátiku (PD) hakarak ko’alia ho Partidu Kongresu Nasionál Rekonstrusaun Timorense (CNRT, sigla portugés) atu aprezenta kandidatu Komisáriu Komisaun Nasionál Eleisaun (CNE) ba períodu 2026 -2031.
Aprezentasaun ne’e sei halo tanba Prezidente CNE, José Agostinho Belo, ho nia kompozisaun atuál ninia mandatu sei termina iha 16 Agostu ne’e.
Tuir Lei númeru 7/2026, loron 29 Maiu, alterasaun dahaat husi Lei númeru 5/2006, loron 28 Dezembru, kona-ba Órgaun Administrasaun Eleitorál, reprezentasaun husi Parlamentu Nasionál iha membru na’in-tolu ba CNE, ho mandatu tinan lima, renovavel. No órgaun lejizlativa ne’e mak sei hili Prezidente CNE, liuhusi eleisaun ba kandidatu sira ne’ebé bankada parlamentár sira aprezenta.
Xefe bankada PD, Manuel Henrique Noronha, hatete bankada iha kandidatu, maibé sei ko’alia ho bankada CNRT hodi bele iha entendimentu molok halo aprezentasaun kandidatura ba meza Parlamentu. “Depois resesu, ita sei ko’alia”, nia informa ba Tatoli, ohin.
Iha sorin seluk, Prezidente Parlamentu Nasionál, Maria Fernanda Lay, dehan maski mandatu Prezidente CNE ho estrutura atuál sei remata iha tempu besik, maibé bele hala’o nafatin serbisu hodi hein Parlamentu halo nomeasaun foun.
Tanba ne’e, Parlamentu sei halo diskusaun ba nomeasaun depoizde resesu iha 15 Setembru tinan ne’e.
Entretantu, kompozisaun komisáriu CNE ne’e iha membru efetivu ida no suplente ida nomeia husi Prezidente Repúblika. No Governu rasik liuhusi desizaun reuniaun Konsellu Ministru iha loron 12 fulan-Agostu ne’e nomeia ona Elviro Fernandes Moniz nu’udar membru efetivu no Odete Maria Belo nu’udar suplente ba membru CNE ho periódu 2026 to’o 2031.
Enkuantu, membru efetivu no suplente ida husi Konsellu Majistratura Judisiál no membru efetivu ida no suplente ida husi Konsellu Majistratura Ministériu Públiku.
Tuir lei, Prezidente Parlamentu mak sei fó pose hafoin dezignasaun.
Jornalista: Nelson de Sousa
Editora: Maria Auxiliadora
