CVTL kontinua fó apoiu umanitáriu ba vítima dezastre naturál iha rai-laran no rai-li’ur
DILI, 14 Agostu 2026 (TATOLI)–Prezidente Konsellu Diretivu Nasionál Cruz Vermelha Timor-Leste (CVTL), Madalena Mello Hanjam Costa Soares, hateten durante ne’e CVTL kontinua fó apoiu umanitáriu ba komunidade afetadu husi dezastre naturál, iha situasaun konflitu no emerjénsia sira, tantu iha rai-laran no rai-internasional
“Iha situasaun defisil, inklui kalamidade naturál no konflitu armadu, CVTL halo servisu bazeia ba prinsipiu no lei Uumanitáriu internasionál. Apoiu ne’e la limita de’it ba Timor-Leste, maibé CVTL mós partisipa iha esforsu solidariedade internasionál, inklui ba vítima dezastre iha Filipina, Myanmar no Indonézia,” Madalena Mello Hanjam Costa Soares esplika ba jornalista sira, iha salaun CNE, Kolmera, ohin.
Nia esplika katak CVTL hetan apoiu finanseiru husi Governu Timor-Leste ho montante millaun $2 kada tinan no liuhusi mobilizasaun rekursu internasionál no durante nia mandate ne’e CVTL konsege mobiliza apoiu entre millaun $4 millaun to’o millaun $6.
“Apoiu ami-nian la’ós ba ema ida ka grupu ida de’it maibé fó tuir nesesidade no nivel dezastre. Iha Timor-Leste, CVTL fó apoiu ba komunidade afetadu iha Ainaro, Same-Manufahi, Suai no área remota sira seluk. Iha rai-li’ur, CVTL mós mobiliza apoiu ba komunidade ne’ebé hasoru dezastre,” nia hateten
Madalena hateten katak CVTL agora mós konsidera atu hato’o mensajen solidariedade ba Kolombia, ne’ebé hasoru dezastre rai-nakdoko maka’as ne’ebé rezulta iha ema liu 250 mate.
Iha área saúde no resposta emerjénsia, CVTL kontinua fó servisu primeiru sokoru ba ema hotu ne’ebé presiza. Iha tempu hanesan, CVTL mós iha servisu komersiál primeiru sokoru ba entidade ka ema sira ne’ebé presiza no uza sira-nia orsamentu rasik.
“Ami nia kontribui iha área bee moos no seguransa saúde liuhusi projetu sira iha komunidade. Durante nia mandatu, liu 400 projetu tama iha CVTL no liu 200 projetu konsege implementa, liuliu iha área remota sira atu hadi’a asesu komunidade ba bee moos. Atinjimentu ami hetan mais 400 proposta ba bee-moos atu dada bee ba komunidade. Ami konsege implementa 200-resin ba iha área remota hotu-hotu hetan bee. Bainhira bee ida-ne’e hetan bele hemu direta, ida-ne’e ami dada ona. Depois halo mós uma ba kbi’it laek. Depois estabelesimentu ba iha Banku Sangue,” nia informa.
Nia relata, CVTL mós kontinua fó atensaun ba mobilizasaun doasaun raan atu ajuda garante disponibilidade raan ba nesesidade iha ospitál sira.
“Servisu umanitáriu CVTL depende barak ba solidariedade, voluntariadu no kooperasaun husi instituisaun sira, ho objetivu atu asegura katak ema sira-ne’ebé afetadu husi dezastre no situasaun emerjénsia bele hetan apoiu tuir sira-nia nesesidade, nia dehan.
Polítika bázika ne’ebé CVTL halo mak armonia polítika, estratéjiku Krus Vermella nian rasik, depois buka osan no halo enkontru kooperasaun la’o mantein kontrolu ho parseiru hotu-hotu liuliu ho Governu to’o hetan ona orsamentu atu ba haree iha operasionál nian mak servisu hanesan dada bee-moos ba komunidade.
Jornalista : Felicidade Ximenes
Editór : Cancio Ximenes
