CVTL realiza asembleia nasionál atu define prioridade estratéjia períodu 2026-2030

DILI, 14 Agostu 2026 (TATOLI)—Cruz Vermelha de Timor-Leste (CVTL) realiza assembleia nasionál ba da-VI durante loron rua, atu avalia progresu organizasaun, hametin governasaun, define prioridade estratéjika no hili lideransa foun ba periodu 2026-2030.

Prezidente Konsellu Diretivu Nasional Cruz Vermelha Timor-Leste (CVTL), Madalena Hanjam, hateten ba mandatu ne’e halo ona servisu lubuk hodi fó apoia umanitária ba populasaun sira iha nasionál no inernasionál.

“Atu hala’o servisu ami auxilia ba Estadu no Governu. Ita labele la’o dook husi konstituisaun tanba ita mós iha estatutu katak ita iha planu estratejiku nasional 2011-2030, atu halo servisu  umanitária ba povu ne’ebé hetan dezastre no problema sosiál sira seluk,” Madalena Hanjam hateten ba jornalista sira iha salaun CNE, Kolmera, ohin.

Nia dehan, durante mandatu tinan ualu ne’e buat barak akontese hanesan bee-sae maka’as iha Dili, durante vizita husi amo papa, nune’e mós akontese dezastre barak hala’o hamutuk. Tanba ida-ne’e husi ema hotu nia esforsu hodi hala’o servisu ne’e ho funsionariu hamutuk 2.00-resin ho voluntariu hamutuk 2.000 to’o 4.000 ne’e mak forsa CVTL nian.

Iha fatin hanesan, Vise Ministru Opsitalár, iha Ministériu Saúde, Flavio Brandão hateten CVTL nia papel iha nasaun ne’e mak fó apoia umanitária ba populasaun hotu  ne’ebé mak hetan dezastre.

“Ohin loron hili lideransa CVTL, maibé momentu mós atu refleta ita-nia lala’ok iha 25 anos nia laran, ita refleta ona papel VCTL nia espíritu voluntuarizmu ho umanitária. Entaun oinsá ba oin   diskusaun asembleia jerál ne’e bele rezulta fila-fali meiu ida-ne’ebé mak mai di’ak-liu ba lideransa foun CVTL atu bele refleta di’ak liután espiritu ida-ne’e,” nia dehan.

Reprezentante Komité Internasionál Cruz Vermelha ka ICRC, Kartika Juwita, hateten CVTL nia servisu umanitáriu importante ne’ebé hala’o liuliu liuhusi programa sira iha komunidade, resposta ba dezastre, ajuda dahuluk no doasaun raan.

“Ami mós apresia VCTL nia papel importante nu’udar entidade auxiliar ba Governu. Enkuantu CVTL kontinua hametin nia kapasidade, ami enkoraja atu kontinua investe iha instituisaun no baze finanseira, kapasidade resposta no jestaun voluntáriu juventude sei kontinua komproetidu atu apoia esforsu sira-ne’e,” nia dehan.

Nia dehan, sira-nia parte mos hein atu kontinua halo kooperasaun no kolaborasaun prátika no fornese apoiu estratéjiku no tékniku iha área sira-ne’ebé sira bele fó valór aumenta, hanesan lei umanitáriu internasionál, restaurasaun ligasaun entre membru família sira, jestaun ba ema mate, Safer Access Framework, preparasaun, no envolvimentu ho autoridade sira. Ida-ne’e sei la’o tuir inisiativa transfronteiriza ne’ebé CVTL hala’o iha inisiativa ida-ne’e.

Reprezentante Federasaun Internasionál Sosiedade Nasionál Cruz Vermellha no Kressente  Vermelho (IFRC), Kathryn Clarkson dehan,oportunidade ida-ne’e mos momentu espesiál  tanba  iha priviléjiu atu mai dala rua ona iha Timor-Leste no servisu hamutuk ho Prezidente CVTL durante tinan tolu.

“Bainhira fila-fali mai ohin, fó oportunidade ba ha’u atu haree no reflete kona-ba progresu boot ne’ebé CVTL halo ona. Ha’u haree organizasaun ne’e iha faze inisiál liu no ohin ha’u haree sosiedade nasionál ida-ne’ebé kontinua hametin nia sukursal, parseria, programa sira no liuliu ligasaun ho komunidade. Iha buat barak atu halo, maibé ida-ne’e mak natureza husi sosiedade nasionál ida-ne’ebé forte: kontinua aprende, adapta no dezenvolve-an,” Kathryn Clarkson esplika.

Nia afirma, reprezentante sira husi sukurzál 13 hotu CVTL mai hamutuk ho responsabilidade importante. La’ós de’it atu hili lideransa foun CVTL ba tinan lima oin mai, inklui Prezidente, Sekretáriu, Vice-Prezidente no Komisaun Finanseira, maibé mós atu hametin responsabilidade organizasionál no kumprimentu iha asaun umanitária, liuhusi haree fila fali estratéjia no desizaun sira ne’ebé halo iha programa no rekursu finanseiru.

Lideransa iha Red Cross la’ós de’it kona-ba okupa pozisaun. Lideransa mak kona-ba servisu, integridade, responsabilidade no obrigasaun ba komunidade. Desizaun sira-ne’ebé sei foti durante Assembleia Jerál ida-ne’e sei ajuda determina direksaun CVTL nian iha tinan sira oin mai.

“CVTL iha ona baze importante liuhusi dezenvolvimentu Planu Estratéjiku. Ha’u hein katak lideransa foun sei kontinua harii no dezenvolve baze estratéjiku ida-ne’e. Liuliu, ha’u fiar katak lokalizasaun tenke kontinua sai iha sentru husi asaun kolektiva ita hotu nian,” nia hateten.

Nia haktuir, IFRC kontinua apoiu CVTL hodi hametin kapasidade atu jere no lidera resposta ba emerjénsia. Kompromisu ida-ne’e la limita de’it ba formasaun, enkontru tékniku no atividade dezenvolvimentu kapasidade. Maibé mós signifika kria oportunidade ba CVTL atu aplika no dezenvolve tan nia esperiénsia no kompeténsia liuhusi operasaun reál.

“Bainhira ita haree ba tinan lima oin mai, ha’u hein katak ita bele haree CVTL sai sosiedade nasionál ida-ne’ebé forte liután, konfiável liután no lidera husi lokal, ne’ebé prontu atu responde ba dezastre, emerjénsia saúde no impaktu klima ne’ebé aumenta. Ha’u hakarak hato’o votu ba CVTL atu assembleia jerál ida-ne’e la’o ho susesu, konstrutivu no transparente, no atu iha hahú forte ba kapitulu foun iha prosesu dezenvolvimentu CVTL,”  nia dehan.

Jornalista : Felicidade Ximenes

Editór        : Cancio Ximeens