EBC 04 Kaizu-Laran menus profesór ba matéria tolu
VIKEKE, 14 Agostu 2026 (TATOLI)—Diretór Ensinu Báziku Sentrál (EBC-sigla portugeza) 04 Agostu Kaizu-Laran, João Viana Soares, hateten eskola ne’e enfrenta menus profesór ba matéria língua tetun, portugés no inglés hodi hanorin estudante sira.
“Iha ami-nia eskola falta profesór. Tan ne’e kada profesór lori matéria rua to’o tolu, entaun dalaruma ami fahe tempu mak la to’o. Ida-ne’e mak durante ne’e sai ami-nia preokupasaun,” João Viana ba TATOLI iha Suku Bahalaraua’in, Postu Vikeke Vila, Sesta ne’e.
Nia haktuir problema menus profesór ne’e parte eskola aprezenta ona pedidu ba Servisu Edukasaun Munisípiu Vikeke, maibé to’o agora Ministériu Eduksaun (ME) seidauk responde problema ne’e.
Tuir dadus, EBC 04 Kaizu-Laran kompostu husi primeiru síklu, segundu síklu no terseiru síklu ho totál estudante hamutuk na’in-700, totál profesór 26 ne’ebé hanorin estudante no saladeaula hamutuk 17.
Hatán ba preokupasaun ne’e, Diretór Servisu Edukasaun Munisípiu Vikeke, António Pinto da Silva, hateten preokupasaun ba menus profesór ne’e kuaze akontese iha eskola barak, nune’e kada eskola sira mak tenke halo jestaun ba rekursu sira-ne’ebé iha hodi hein prosesu rekrutamentu husi ME.
Jornalista: Vitorino Lopes da Costa
Editór: Xisto Freitas da Piedade
