EBF Aimutin falta manorin lian Portugés, husu ME koloka tan profesór
DÍLI, 14 Agostu 2026 (TATOLI) – Kordenadór Ensinu Báziku Filiál (EBF) Siklu 1 no 2 Aimutin, Isabel Salsinha Alves de Jesus, hatete katak eskola ne’e sei falta manorin ba matéria Lían Portugés.
Tanba ne’e, nia husu Ministériu Edukasaun atu koloka tan manorin Portugés iha EBF Aimutin, Díli, atu estudante sira bele hetan aprendizajen Língua Portugés ne’ebé di’ak no efetivu.
“Dadaun ne’e iha manorin Portugés, maibé nain rua de’it. Tanba ne’e, difísil atu hanorin estudante sira husi klase 1 to’o klase 6, husi dadeer to’o lokraik,” Isabel hateten ba TATOLI iha iha EBF Aimutin, Díli, ohin.
Nia husu Governu, liuhusi Ministériu Edukasaun, atu koloka tan manorin Portugés nain tolu hodi kompleta nesesidade manorin ba matéria Língua Portugés iha eskola ne’e.
“Ministériu tenke koloka tan manorin na’in tolu mai iha ami nia eskola, tanba estudante sira aumenta beibeik, maibé manorin ba Língua Portugés sei menus,” Isabel dehan.
EBF Siklu 1 no 2 Aimutin iha estudante hamutuk 992, sala aula 10 no manorin hamutuk na’in 20.
Enkuantu, mós husu Ministériu Edukasaun atu konstrui tan sala aula hodi bele akomoda estudante sira ho prosesu aprendizajen ne’ebé mak di’ak iha futuru.
“Ami iha de’it sala 10, tanba ne’e la sufisiente hodi akomoda estudante na’in 992. Entaun, ami jere hodi fahe oráriu aprendizjen ba dader no lokraik. Medida ida ne’e ami halo atu kontrola estudante ho máximu,” Isabel dehan.
Jornalista: Camilio de Sousa
Editór: Filomeno Martins
