ME halo tan xamada ba manorin eskola CAFE
DILI, 14 Agostu 2026 (TATOLI)—Ministériu Edukasaun (ME) planeia tan hodi halo xamada ba manorin iha bolsa ME nian, hodi halo kolokasaun ba ensinu báziku iha eskola Sentru Apredizajen no Formasaun Eskolár (CAFE-sigla portugeza).
“Ita hahú halo xamada ba ita-nia manorin iha bolsu kandidatu hamutuk 200. Ne’ebé, ita presiza manorin 52 atu koloka ba ensinu báziku iha eskola CAFE,” Diretór Nasionál Rekursu Umanu, João Amaral dehan ba TATOLI via Whatsapp, Sesta ne’e.
Nia dehan manorin sira-ne’e iha bolsu kandidatu Ensinu Sekundáriu Tékniku Voksionál ne’ebé ME planeia koloka ba ensinu báziku iha eskola CAFE.
“Ita agora foti hela ita-nia manorin iha bolsu kandidatu sira hodi koloka ba ensinu báziku sira iha eskola CAFE. Maibé, kestaun atu aseita no lae, ne’e sira mak deside. Sira la aseita ne’e ami la obriga, se hakarak aseita ma kami koloka sira,” nia tenik.
Bazeia ba Desizaun Nú. 340/2026/CFP aprova númeru vagas ba Sentru Aprendizaen noFormasaun Eskolar (CAFE), nune’e Diresaun Jerál Administrasaun no Finansa aviza ba kandidatu sira atu haree avizu kolokasaun iha aneksu ba sira-nia aseitasaun.
Nia esplika ba kandidatu sira-ne’ebé konkorda ho kolokasaun referida atu mai asina termu aseitasaun ka xamada molok integra ba karreira dosente no submete dokumentu komprovativu. Hanesan RDTL, Identidade BI no Kartaun Eleitorál, Rejistu Kriminál ne’ebé válidu, Atestadu Médiku hosi Hospital Nacional Guido Valadares, Diploma Mínimu Lisensiatura hosi Mnistériu Ensinu Superiór, Siénsia no Kultura no Konta Bankária ho Númeru IBAN.
Diretór Nasionál dehan ba kandidatu sira ba uluk survey fatin kolokasaun bazeia ba aneksu kolokasaun iha lista, nune’e fó informasaun klara kandidatu ida-idak molok foti desizaun atu aseita ka rejeita xamada kolokasaun.
Nune’e mós iha posibilidade ba kandidatu sira-ne’ebé hakarak troka fatin kolokasaun, tenke identifika ema ne’ebé ho intensaun ho konsiderasaun ba área disiplina, no tenke prenxe formatu troka malu fatin kolokasaun.
Ba kandidatu sira-ne’ebé la marka prezensa iha data ne’ebé determina ona hodi hatán ba xamada kolokasaun, sei konsidera desiste no ba kandidatu sira-ne’ebé la aseita/rejeita ho xamada kolokasaun, sei la implika ho númeru seriasaun bolsa.
Jornalista: Osória Marques
Editór: Xisto Freitas da Piedade
