Qatar Airways hasoru Prezidente Ramos-Horta hodi aprezenta rede voo internasionál
DILI, 14 agostu 2026 (TATOLI)—Diretór Rejionál Qatar Airways ba ASEAN, Dato’ Muzammil Bin Mohamad, hasoru malu ho Prezidente Repúblika, José Ramos-Horta, sesta ne’e, iha Palásiu Prezidensiál Nicolau Lobato Dili, hodi ko’alia kona-ba rede voo internasionál.
Enkontru ne’e ho objetivu atu aprezenta formalmente ba Xefe Estadu servisu premium no rede destinus mundiál ne’ebé kompañia aviasaun ne’e oferese.
Durante enkontru, Dato’ Muzammil aprezenta rede internasionál voos Qatar Airways nian. Nia fó destake ba opsaun ligasaun aviasaun ne’ebé disponivel ba pasajeiru sira husi Timor-Leste.
Nia esplika katak viajante sira husi Timor-Leste bele asesu fasil ba destinu sira iha Europa, Amérika no rejiaun seluk. Ne’e liuhusi sentru tránzitu rejionál hanesan Bali no Kuala Lumpur, antes kontinua ba sentru prinsipál operasaun ka hub Qatar Airways nian iha Doha.
“Ami aprezenta ba Prezidente rede internasionál ne’ebé ami iha. Pasajeiru sira husi Timor-Leste bele asesu fasil ba Europa, Amérika no mundu tomak liuhusi ami-nia sentru iha Doha, ho ligasaun iha Bali no Kuala Lumpur,” Dato’ Muzammil hateten hafoin enkontru.
Aprezentasaun ne’e simu di’ak husi Xefe Estadu. Tuir Dato’ Muzammil, Prezidente Ramos-Horta hatudu ona koñesimentu di’ak kona-ba Qatar Airways.
“Prezidente Ramos-Horta hateten katak nia hatene di’ak ona Qatar Airways no mos hanoin fila-fali katak durante tinan sira liubá nia vizita Estadu Catar dala barak,” nia afirma.
Enkontru ne’e hala’o iha atmosfera amizade no konstrutivu. Sira troka hanoin kona-ba oportunidade sira atu hametin konetividade internasionál Timor-Leste nian.
Dato’ Muzammil dehan enkontru ne’e mós koalia kona-ba potensial atu haburas relasaun entre Timor-Leste ho rede transporte aéreu mundiál ne’ebé Qatar Airways disponibiliza.
“Ami koalia kona-ba oinsá bele hametin liután konetividade Timor-Leste nian ho mundu no oinsá atu haburas relasaun ho ami-nia rede transporte aéreu globál,” nia dehan.
Jornalista : Hortêncio Sanchez
Editór : Cancio Ximenes
