Hametin relasaun ho Governu foun, g7+ hala’o misaun ofisiál bá Illa Salomaun
DILI, 15 Agostu 2026 (TATOLI)-Sekretaria Estadu g7+ ne’ebé lidera husi Sekretáriu-Jerál g7+, Helder da Costa, ho ekipa hala’o misaun ofisiál ba Honiara, Illa Salomaun, entre loron 10 no 15 Agostu 2026.
“Objetivu prinsipál husi misaun ne’e mak atu hametin relasaun ho Governu foun Illa Salomaun nian, nu’udar lidera hela Prezidénsia g7+. Aleinde ne’e atu buka mós apoiu hodi haree ba vizaun no prioridade organizasaun nian”, Helder da Costa hatete iha nota imprwnsa ne’ebé Tatoli asesu ohin.
Nia dehan durante misau loron lima, delegasaun sei hasoru malu ho líder seniór sira husi Governu nian, instituisaun nasionál, inklui mós Primeiru-Ministru.
Tuir nia, instituisaun sira ne’ebé g7+ sei vizita mak hanesan Ministériu Negósiu Estranjeiru no Komérsiu Exteriór, Parlamentu Nasionál, Ministériu Finansa no Tezouru, Ministériu Minerál, Enerjia no Eletrifikasaun Rurál, Ministériu Governasaun Tradisionál, Pás no Asuntu Ekleziástiku, Ministériu Planeamentu Nasionál no Koordenasaun Dezenvolvimentu, Ministériu Justisa no Asuntu Legál, Ministériu Ambiente ba Mudansa Klimatika, Jestaun Dezastre no Meterolojia, inklui parseiru dezenvolvimentu no organizasaun sosiedade sivíl sira.
Dirijente ne’e subliña katak bazeia ba enkontru ministeriál ba daneen, ne’ebé realiza iha Abrí 2025, iha Dili, Timor-Leste, ne’ebé Estadu-membru sira hotu hili Illa Salomaun mak asume Prezidénsia g7+ ba períodu tinan rua, ne’ebé komesa husi Janeiru 2026 to’o Dezembru 2027. Repúblika Demokratika Kongo ho Repúblika Liberia mak sai nu’udar vise-prezidente ho períodu hanesan.
Nia esplika katak hanesan Prezidente, Illa Salomaun iha ninia papél krítiku atu forma ajenda, haforsa solidariedade entre Estadu-membru g7+ nian, no hasa’e vizibilidade organizasaun nian hodi influensia iha rejionál no nivel internasionál.
“Misaun ne’e mós atu halo advokasia no misaun aprendida entre membru Estadu sira ne’ebé sai importante liu”, dehan.
Nia esplika parte importante liu ne’ebé sei foka liu durante misaun ne’e mak sozializa ajenda g7+ nian ba Governu Illa Salomaun nian hodi esplora oinsá Illa ne’e bele hala’o nia papél loloos nu’udar Prezidente atu hala’o g7+ nia vizaun, haforsa no konsolida membru sira, hasae estratéjia parseiru, no asegura katak prespetiva nasaun sira afetada husi konflitu nia lian bele rona husi ema sira ne’ebé halo desizaun iha nivel internasionál.
Delegasaun mós sei diskute kona-ba preparasaun g7+ atu realiza simeira iha ámbitu Assembleia Jerál Nasaun Unida nian, iha loron 23 Setembru 2026 iha Nova Iorke, iha ne’ebé sei sai plataforma importante ba Estadu-Membru sira hodi reafirma g7+ nia kompromisu kona-ba pás, reziliénsia no dezenvolvimentu lidera nasaun rasik.
Helder hateten, durante misaun ne’e, delegasaun sei realiza mós diskusaun meza redonda ho sosiedade sivíl no parseiru dezenvolvimentu sira hodi fahe hanoin kona-ba harii pás no harii Estadu iha Illa Salomaun.
Depoi sei iha mós palestra públika ba estudante sira iha universidade, hodi oferese oportunidade atu diskute ho joven sira kona-ba problema sira relasiona ho pás, dezenvolvimentu, reziliénsia nomós ajenda g7+ nian.
Antes ne’e, g7+ hala’o tiha ona misaun dala-rua ba Illa Salomaun. Misaun primeiru hala’o iha fulan-Abríl 2024 bainhira g7+ haruka nia ekipa observadór ba eleisaun ne’ebé lidera husi Komisáriu Eleitorál Papua Nova-Giné nian hodi observa Eleisaun Jerál no Illa Salomaun nian.
Bazeia ba desizaun koletiva husi Estadu-membru sira hodi nomeia Illa Salomaun nu’udar prezidente ba g7+ iha 2025, entaun Sekretariadu g7+ organiza kedas misaun aprendida ida ho delegasaun altu nivel husi Ministériu Petróleu no Rekursu Minerál Timor-Leste nian atu aprende no fahe esperiénsia ho Ministeriu Minerál Enerjia no Eletrifikasaun Rurál Illa Salomaun nian, ne’ebé hamosu rezultadu ida atu asina akordu ida entre nasaun rua iha área referida
Jornalista: Arminda Fonseca
Editora: Maria Auxiliadora
