Oknun PNTL tiru abitante, Xefe Suku Irabin husu reforsa formasaun kona-ba uza arma
VIKEKE, 15 Agustu 2026 (TATOLI)-Xefe suku Irabin de Baixo, postu administrativu Uatukarbau, munisípiu Vikeke, José Baptista do Carmo, husu ba Komandu Jerál Polísia Nasionál Timor Leste (PNTL) atu reforsa formasaun no kontrolu ba membru sira kona-ba utilizasaun arma, depoizde membru PNTL ida husi Eskuandra Uatukarbau tiru kanek abitante ida iha suku ne’e.
Nia dehan, uza arma kontra sidadaun ne’ebé viola regra tránzitu la’ós medida apropriada, tanba kódigu estrada prevee sansaun ka multa ba sidadaun sira ne’ebé viola regra tránzitu.
“Ohin dader ne’e ha’u-nia komunidade sai ho motorizada, maibé la taka kapasete. Ne’e sala kontra kódigu estrada. Maibé, loloos ne’e PNTL tilang de’it, haruka bá selu iha banku, la’ós uza arma ba tiru fali. Tanba ne’e, ha’u husu Komandu Jerál PNTL presiza fó formasaun barak ba ita-nia membru sira kona-ba uza arma, atu labele uza sala”, José Baptista do Carmo dehan ba Tatoli, iha postu Uatukarbau, ohin.
Nia esplika katak kódigu estrada, ne’ebé regula iba Dekretu-Lei Nú. 6/2003, loron 3 fulan-Abríl, kona-ba Kódigu Estrada, determina sansaun ba sidadaun sira ne’ebé viola regra tránzitu, la’ós uza arma atu tiru fali.
“Tanba ne’e, ha’u prefere Komandu Jerál kria formasaun barak ba membru sira, liuliu kona-ba Lei Kódigu Estrada nian ba polísia, atu labele repete tan kazu agora akontese iha ami-nia postu Uatukarbau”, nia hato’o.
Kona-ba kazu ne’e, xefe suku ne’e dehan família vítima no autoridade lokál sira bá Eskuadra PNTL Uatukarbau atu ko’alia ho parte sira para hakalma situasaun.
“Depois akotense kazu oknun membru PNTL tiru ami-nia joven ne’e, ami ho família bá rezolve kedas iha eskuadra Uatukarbau. Ami konsege ko’alia tuir malu ho di’ak. Maibé, ba prosesu invetigasaun kontinua la’o”, nia akrexenta.
João do Carmo dehan situasaun atuál iha postu Uatukarbau la’o hakmatek, no membru PNTL ne’ebé suspeita tiru vítima ne’e tula ona husi ekipa PNTL munisípiu Vikeke hodi prosesa kazu ne’e.
Vítima Silvano Gomes, tinan 30, husi aldeia Taradai, suku Irabin de Baixo, hetan tiru pur volta tuku 8h00 dadeer, iha parte kabun no borus. Vítima ne’e transfere kedas bá Sentru Saúde Internamentu Vikeke hodi hetan tratamentu.
Ba kazu ne’e, jornalista Tatoli tenta konfirma ho Komandante Eskuadra Utukarbau, maibé labele fó komentáriu tanba ne’e Komandante PNTL Munisípiu mak bele fó informasaun.
Jornalista: Vitorino Lopes da Costa
Editora : Maria Auxiliadora
