Rai-Nakdoko iha Indonézia: Númeru ema mate sa’e ba 38

DILI, 15 Agostu 2026 (TATOLI) – Xefe Ajénsia Nasionál Jestaun Dezastre (BNPB, sigla indonézia), Tenente-Jenerál Suharyanto, fó-sai katak to’o tuku 15:00 lokraik iha loron-sábadu, rejista ona ema na’in-38 mak mate tanba impkatu hosi rai-nakdoko ho magnitude 7.7 iha Rejénsia Nagekeo, Provínsia Nusa Tenggara Leste.

“To’o tuku 15:00 ohin, númeru ema mate hamutuk na’in-38,” hatete hosi Suharyanto durante konferénsia imprensa online ida iha Jakarta, iha loron-sábadu ne’e.

Adisionalmente, ema na’in-rua hetan kanek todan, enkuantu na’in-11 seluk hetan kanek kmaan, maizumenus ema na’in-2,000 maka evakua ona.

Autoridade sira nota mós katak rai-halai akontese iha estrada oioin tanba rai-nakdoko, enkuantu uma sanulu resin hetan estragu maka’as, moderadu ka ki’ik.

Kona-ba fasilidade saúde sira, ospitál ida iha Maumere hetan estragu, hamutuk ho sentru saúde komunitáriu lubuk ida.

“Ministru Saúde mós relata katak sentru saúde komunitáriu barak maka hetan estragu, maske ospitál ida de’it – ida iha Maumere mak hetan estragu,” dehan Suharyanto. Entretantu, aeroportu lima mak afetadu.

“Aeroportu lima mak afetadu, pista sira lae. Estragu sira  tantu klasifikadu hanesan ki’ik, moderadu, ka grave – akontese iha edifísiu sira terminál nian,” nia hatete.

Portu rua maka afetadu: Portu Reo no Portu Maumere.

Notísia relevante:  Ema na’in-rua mate hafoin rai-nakdoko ho magnitedu 7,7 iha NTT

Fonte: Antara