Reabilitasaun estrada urbana iha Ainaru atinje 15%
AINARU, 15 Agostu 2026 (TATOLI)-Ministru Obra Públika, Samuel Marçal, hamutuk ho ekipa tékniku sira halo observasaun ba projetu reabilitasaun estrada urbana iha suku Ainaru, postu Ainaru, munisípiu Ainaru no identifika ninia progresu atinje 15%.
Reabilitasaun estrada urbana Ainaru fahe ba pakote rua ne’ebé daudaun serbisu la’o hela iha faze konstrusaun drainajen ne’ebé implementa iha suku Ainaru, Manutasi no Suro.
Ministru Obra Públika, Samuel Marçal, hatete reabilitasaun estrada ne’e hamutuk kilómetru 12, ne’ebé foin asina kontratu iha fulan hirak liubá no obra ne’e tarde uitoan tanba klima, asuntu sosiál no empreza mós foin mobiliza sira-nia ekipamentu.
Ministru apela ba empreza atu esforsu hodi eleva
ezekusaun serbisu bele atinji tuir kontratu ne’ebé iha no nia mós husu atu monta lampu, nune’e traballadór sira bele halo serbisu iha tempu kalan.
“Atividade monitorizasaun aleinde iha ne’e ita mós sei observa projetu reabilitasaun estrada iha Kasa, Zumalai, Maukatar, Suai Vila, Betanu no sei haree mós fatin balun ne’ebé grave hodi prepara dezeñu”, nia adianta.
Diretór kompañia Fortuna Star, Siu peng lay, hatete serbisu ne’ebé sira implementa ne’e kategoria estrada urbana, maibé sira foka de’it uluk ba pakote rua husi suku tolu maka Suro, Manutasi no Ainaru.
“Signifika serbisu ne’ebé ami halo ne’e iha área ninin de’it bazeia ba dezeñu ne’ebé iha, nune’e agora obra la’o hela la’ós abandona”, jestór kompañia esplika.
Nia hatutan katak projetu ne’e asina iha fulan-Fevereiru, maibé sira seidauk kontinua halo serbisu tanba tenke mobiliza ekipamentu no kondisaun klima (udan) mak la fó oportunidade ba sira.
“Ami atu halo serbisu maibé ho kondisaun iklima entaun ekipa téknika MOP lahatán tanba sei fó impaktu ba kualidade obra, nune’e ami foin hahú halo serbisu iha fulan-Jullu no ami halo uluk mak drainajen nian”, dehan.
Nia hatutan konstrusaun drainajen iha tipu rua maka drainajen ne’ebé tenke halo husi etapa ba etapa no seluk prodús feitu kedas ne’ebé nia materiál ne’e halo iha Dili.
“Durante implementa projetu problema ne’ebé ami enfrenta mak traballadór sira iha terrenu no mós produsaun materiál dook husi lokalizasaun projetu”, nia relata.
Lembra katak projetu reabilitasaun estrada urbana ne’e sei konstrui ho pakote rua ho durasaun tinan ida. Iha ne’ebé pakote dahuluk ho distánsia 6.058,02 km ho númeru SSS/009/MOP-2026, no valór kontratu kontratu $4.324.875,85, responsabiliza husi Fortuna Star Unipessoal, ho durasaun fulan neen, no pakote daruak ho distánsia 6.193,25 km, ho númeru kontratu SSS/010/MOP-2026, ho valór orsamentu $4.324.875,85, ezekuta husi Riqueza Gavinto Unipessoal durante fulan neen.
Jornalista: Alexandra da Costa
Editora: Maria Auxiliadora
