ADTL fortalese kapasidade jestaun organizasaun ba ema ho defisiénsia
DÍLI, 17 Agostu 2026 (TATOLI) – Asosiasaun Defisiénsia Timor-Leste (ADTL) realiza formasaun kona-ba fortalese kapasidade organizasaun ba membru sira no parseiru sira, ho partisipasaun ema na’in 17.
Formasaun ne’e ho objetivu atu hasa’e koñesimentu no kapasidade iha jestaun organizasaun, nune’e membru sira bele hadi’a implementasaun programa no prestasaun servisu ba ema ho defisiénsia iha Timor-Leste.
Diretór Ezekutivu ADTL, Cesário da Silva, hateten katak formasaun ne’e fó atensaun ba área importante sira, inklui jestaun organizasaun, planeamentu atividade, preparasaun relatóriu programa, jestaun finansa, salvaguarda, inkluzaun no asesibilidade.
Partisipante sira mós aprende kona-ba responsabilidade organizasaun nian no oinsá atu asegura implementasaun projetu sira ho transparénsia no responsabilidade.
“Investimentu iha dezenvolvimentu kapasidade organizasaun importante tebes atu hametin lideransa no jestaun membru sira, tanba organizasaun forte sei bele fó kontribuisaun boot liu ba promosaun direitu ema ho defisiénsia no dezenvolvimentu sosiedade inkluziva iha rai-laran,” Cesário hateten ba TATOLI iha nia fatin servisu, Mascarenhas, Dili, iha Segunda ne’e.
Cesário subliña katak formasaun hanesan ne’e ajuda organizasaun membru sira atu aumenta efisiénsia servisu, hadi’a koordenasaun no promove partisipasaun ativu ema ho defisiénsia iha prosesu dezenvolvimentu nasionál.
Nia dehan katak formasaun fortalese kapasidade ne’e sai parte husi esforsu ADTL atu harii organizasaun membru sira ne’ebé forte, independente no sustentável, hodi bele responde di’ak liu ba nesesidade komunidade ema ho defisiénsia iha Timor-Leste.
“ADTL kontinua komprometidu atu hakbi’it organizasaun membru sira hodi asegura katak ema ho defisiénsia sira bele hetan oportunidade hanesan no asesu ba servisu públiku no programa dezenvolvimentu,” nia konklui.
Jornalista: Camilio de Sousa
Editór: Filomeno Martins
