CNE-STAE relata preparasaun eleisaun Prezidensiál 2027 ba Prezidente Ramos-Horta
DILI, 17 Agostu 2026 (TATOLI)—Vise-Prezidente Komisaun Nasionál Eleisaun (CNE), Domingos Barreto, no Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz, segunda ne’e, hasoru malu ho Prezidente Repúblika, José Ramos-Horta hodi atualiza kona-ba servisu ne’ebé parte rua halo hodi prepara ba eleisaun Prezidensiál 2027.
Vise Prezidente CNE, Domingos Barreto, dehan Prezidente Repúblika bolu sira mai atu atualiza de’it kona-ba servisu CNE nianno CNE mós relata ona servisu lubuk ida ba Prezidente Repúblika.
“Prezidente Repúblika bolu ami mai atu atualzia de’it kona-ba servisu CNE nian ba eleisaun Prezidensiál 2027 nian, entaun ami relata servisu lubuk ida ba ita-nia Prezidente,” Domingos Barreto hateten ba jornalista sira hafoin enkontru.
Nia mós informa katak mandatu komisaun CNE nian sei termina iha fulan-Agostu tinan 2026 ne’e.
“Ami mós hato’o katak ami-nia mandatu mós sei termina iha fulan ida-ne’e,” nia afirma.
Domingos Barreto esplika katak durante ne’e CNE hala’o ona servisu edukasaun sívika no enkontru ho partidu polítiku sira no kona-ba preparasaun másimu ne’e sei hein dekreta husi Prezidente.
“Servisu ne’ebé durante ne’e CNE halo mak edukasaun sívika, enkontru ho partidu polítiku sira. Mais kle’an liu ne’e ita hein lai Prezidente dekreta mak ita foin halo preparasaun másimu, mais ida-ne’e komisáriu sira foun mai mak bele halo servisu sira,” nia dehan.
Nia subliña katak CNE nu’udar órgaun tékniku no sei implementa de’it tuir lei ne’ebé vigora. Nia husu atu halo alterasaun ba lei sira antes implementa prosesu votasaun.
“Prezidente bele husu atu sidadaun sira vota livre, maibé halo lai alterasaun ba lei sira mak ami bele implementa, ami ne’e tékniku hein implementa de’it tuir lei,” nia tenik.
Iha fatin hanesan, Diretór Jerál STAE, Elviro Fernandes Moniz, atualiza kona-ba númeru eleitór sira-ne’ebé rejista ona iha sistema biométriku.
Nia dehan totál eleitór sira-ne’ebé resensia iha tinan anteriór hamutuk rihun 974 no husi númeru ne’e, iha pursentu 39 mak atualiza ona ba sistema biométriku.
“Hanesan ita hotu hatene totál eleitór sira-ne’ebé resensia iha tinan anteriór no sira-ne’ebé mak rejista ita implementa sistema biométriku purvolta rihun 974, no husi númeru ne’e 39% mak atualiza ona ba sistema biométriku,” nia hateten.
Nia esplika katak STAE iha alvu atu to’o iha inísiu 2027 bele liu 70% tanbaa iha semana oin ne’e STAE sei koordena ho CNE hodi atualiza baze dadus hodi halo atendimentu iha Postu Administrativu sira.
“Maibé ita-nia alvu inísiu 2027 ita bele liu 70%, tanba semana oin ita sei koordena ho CNE atu atualiza fali baze dadus atu halo atendimentu iha Postu Administrativu sira,” nia afirma.
Elviro Fernandes Moniz mós dehan Prezidente husu ba CNE no STAE atu prepara di’ak liután prosesu sira hotu ba eleisaun.
Nia afirma parte rua sei kontinua hala’o sira-nia funsaun hodi hasoru eleisaun 2027 no 2028 ho di’ak no organizadu.
“Ohin Prezidente mós husu CNE no STAE atu prepara di’ak liután prosesu sira hotu ba eleisaun nian, ohin ami partilla de’it servisu ne’ebé durante ne’e ami halo. Maibé ami parte rua halo nafatin ida-idak nia funsaun hodi hasoru eleisaun sira ne’ebé sei mai iha 2027 no 2028 ho di’ak no organizadu. Entaun, STAE aprezenta ba Prezidente mak halo resenseamentu iha rai-laran no rai-liur,” nia dehan.
Jornalista : Hortêncio Sanchez
Editór : Cancio Ximenes
