GTMINI CPLP finaliza diskusaun ba dokumentu 28
DILI, 17 Agostu 2026 (TATOLI)—Konselleiru no Reprezentante Misaun Permanente Timor-Leste iha Komunidade País sira ho Lian Portugés (CPLP) iha Lisboa, Aviano Faria, hateten Grupu Tékniku Ministeriál CPLP (GTMINI) finaliza ona sira-nia diskusaun ba dokumentu 28 iha reuniaun ne’ebé hla’o iha Dili.
Reuniaun ne’e hahú iha 12 Agostu ne’e no termina ohin. GTMINI kompostu husi reprezentante segundu nível husi Estadu-membru sira CPLP nian ne’ebé iha misaun permanente.
Aviano Faria esplika katak GTMINI nia kna’ar mak prepara no analiza dokumentu tékniku sira, relatóriu no projetu rezolusaun molok submete ba aprovasaun ofisiál iha Konsellu Ministru CPLP nian.
“Ohin dader ami taka ona kona-ba deklarasaun 30 tinan CPLP nian. Iha ne’ebé Estadu-membru sira fó sira-nia hanoin, ida-idak aprezenta ninia redasaun kona-ba interese ne’ebé durante ne’e CPLP alkansa,” Aviano Faria hateten ba jornalista sira iha edifisiu Ministériu Negósiu Estranjeiru no Kooperasaun (MNEK Dili, segunda ne’e.
Nia dehan, iha nível tékniku ministeriál, sira hetan ona konsensu no konsege taka dokumentu hamutuk 28.
Dokumentu sira-ne’e sei ba ministru sira haree iha reuniaun Konsellu Ministru. Maibé molok to’o iha Reuniaun Konsellu Ministru CPLP, aban sei iha tan sesaun apresiasaun iha nível Reprezentante Permanente ka Embaixadór Estadu-membru sira-ne’ebé akreditadu iha CPLP.
“Ohin ami mós hahú ami-nia reuniaun ida-ne’ebé hanaran Grupu Traballu Komité Konsultasaun Permanente (GT PCP). Ne’e grupu ida-ne’ebé prepara ajenda no dokumentu sira-ne’ebé atu trata ba embaixadór sira aban atu ko’alia ka diskute,” nia afirma.
Nia esplika katak GT PCP sei halo revizaun fali ba asuntu hotu-hotu ne’ebé diskute ona iha reuniaun GTMINI hodi haree kompletu ona ka seidauk. Hafoin ne’e halo rekonfirmasaun ho Estadu-membru sira karik sei iha komentáriu ruma ka hanoin foun ruma.
“Purtantu ohin ami hahú realiza reuniaun GT PCP hodi haree fila-fali ka halo revizaun ida durante reuniaun GTMINI atu haree fali asuntu hotu-hotu los ona ka seidauk kompletu ona ka lae, hafoin ne’e halo rekonfirmasaun ho Estadu-membru sira,” nia dehan.
Ajenda ba Nova Iorke no Konferénsia Justisa
Aviano Faria akresenta katak iha reuniaun ohin GT PCP mós ko’alia kona-ba pontu rua ne’ebé Timor-Leste aprezenta ba Estadu-membru sira atu akresenta iha ajenda.
Pontu dahuluk maka kona-ba Timor-Leste sei organiza ka sei akolle Konferénsia Ministru Justisa CPLP nian ne’ebé prevee ba fulan oin.
Pontu daruak maka ajenda ne’ebé Estadu-membru sira atu ko’alia iha Nova Iorque, iha marjen Asembleia Jerál Nasoins Unidas iha setembru.
“Konkrétamente asuntu saida mak Ministru ka Xefe Estadu sira atu ko’alia iha Nasoins Unidas. Normalmente Xefe Estadu sira CPLP nian sei halo reuniaun konsultasaun polítika antes partisipa iha Asembleia Jerál ONU,” nia esplika.
Nia dehan konkretamente Embaixadora Timor-Leste ba CPLP, Natália Carrascalão, aban sei aprezenta ba ninia homólogu sira kona-ba ajenda prezidénsia pro tempore Timor-Leste nian ne’ebé sei lori ba ko’alia iha marjen Asembleia Jerál Nasoins Unidas.
Nia konfirma katak dokumentu sira tenke taka ona ohin iha nível tékniku. Aban Embaixadór sira Estadu-membru akreditadu ba CPLP sei halo fali reuniaun hodi halo revizaun. Bainhira los hotu ona sei submete ba Reuniaun Konsellu Ministru hodi halo aprovasaun ne’ebé ajenda ona ba loron 19 fulan ne’e.
Jornalista : Hortêncio Sanchez
Editór : Cancio Ximenes
