Instalasaun poste iluminasaun solar 897 fó nabilan ba sidade Balibó no Maliana iha Setembru
BOBONARU,17 Agostu 2026 (TATOLI) – Empreza lokál Mapihl Unipessoál Lda., hahú implementa projetu fornesimentu no instalasaun sistema iluminasaun públika solar-PV, ho 879, iha via públika ne’ebé liga postu administrativu Balibó Vila ho kapitál Maliana, munisípiu Bobonaru.
Projetu ne’e, tuir planu, sei finaliza iha fulan-Setembru tinan ne’e, ho objetivu atu fó naroman ba estrada no hadi’a seguransa, konfortu, no asetu estétiku iha área urbana Balibó no Maliana.
Diretór Epmreza Mapihl Lda., Fransisco da Cruz, konfirma obra implementasaun obra ne’e to’o ona iha faze preparasaun fatin ba instalasaun poste sira.
“Nia loron ida rua tan sei finaliza 100% serbisu ankur nian. Segunda semana oin ita hahú intala ona iluminasaun no poste hamutuk unidade 897 husi Balibó Vila to’o Maliana Vila. Ita-nia alvu tama iha meadu Setembru finaliza ona, atu Balibó Vila ho sidade Maliana nabilan ona”, nia informa ba jornalista sira, ohin.
Francisco hatete katak intalasaun ba iluminasaun ne’e kobre distansía kilómetru entre kilómetru 27 to’o 30, ho distánisa entre poste ida no seluk ajudta tuir kondisaun área.
“Depende ba distánsia entre poste ida ba poste seluk. Iha área urbana, distánsia entre poste sira ne’e metru 30 de’it. Iha área tama bairru, ita tau metru 35, kuandu husi Soso bá Nunura ne’e ita tau metru 40 husi poste ida ba poste aeluk,”, nia dehan.
Koordenadór Eletrisidade Timor-Leste, Empreza Públika (EDTL, E.P), Mário de Jesus Soares, hatete tékniku sira kontinua halo monitorizasaun ba implementasaun rojetu ne’e atu asegura nia kualidade obra.
Mario dehan Governu implementa rojetu ne’e la’ós de’it atu fó naroman ba estrada, maibé mós atu garante seguransa no beleza sidade, liuliu iha tempu kalan.
“Se obra ne’e finaliza, Balibó no Maliana sei sai sidade ida di’ak no nabilan tanba apoia husi iluminasaun ne’e. Ha’u hakarak hato’o ba komunidade hotu atu tai-matan, asegura ba obra ne’e, tanba Estadu fakar osan barak atu ita sente dezenvolvimentu”, nia realsa.
Iha sorin seluk, motorista ojek iha Maliana, Gilberto Amarál, kontente ho instalsaun ne’e, tanba konsidera bele ajuda motorista no utilizadór estrada sira atu halo movimentu ho seguru no konfortu.
“Loraik mak ami tula ema tama bairru sira ne’e nakukun, ita ta’uk, ita halai dalaruma ema ka animál ruma mai korta mós ita la hetae. Se lampu ne’e iha ona, estrada mos di’ak, kalan ami bele tula pasajeiru bá-mai”, nia dehan.
EDTL, E.P., halo kontratu ho empreza Mapihl ho ajusta direita liuhusi projetu iluminasaun públika solar-PV ne’e.
Ilumuniasaun públika (Public Street Lighting/PJU), iha papél importante atu fó naroman ba utilizadór estrada sira iha tempu kalan. Prezensa iluminasaun bele ajuda hamenus risku ba asidente, hamenus taxa krime nian iha área públika, no apoia atividade sosiál no ekonómika sira, hodi garante katak komunidade kontinua hala’o atividade ho seguru no konfortavel hafoin loromatan monu.
Iluminasaun iha estrada mós ajuda kondutór no ema la’o ain sira atu haree ho klaru kondisaun estrada, sinalizasaun no obstákulu sira. Aleinde ne’e, área ne’ebé iha naroman di’ak bele kontribui ba prevensaun krime no fó sentimentu seguransa ba públiku.
Iluminasaun públika mós bele sai hanesan instrumentu navegasaun ba utilizadór estrada sira, tanba ajuda sira rekoñese diresaun, kruzamentu no ambiente sira durante tempu nakukun.
Iha aspétu estétiku, iluminasaun ne’ebé di’ak bele kontribui ba beleza no atrasaun sidade, liuliu durante kalan.
Notísia relevante: Reabilitasaun estrada Maliana hatudu progresu, “Ida-ne’e mak ami povu nia hakarak”
Jornalista: Sergio da Cruz
Editora: Maria Auxiliadora
