MAE-Komisaun Apoia Prezidénsia Rotativa CPLP diskute Plataforma Dijitál
DILI, 17 Agostu 2026 (TATOLI)—Governu liuhosi Ministériu Administrasaun Estatál (MAE) hamutuk ho Komisaun Apoia Prezidénsia Rotativa Komunidade Ko’alia Lian Portugés (CPLP-sigla portugeza), Segunda ne’e, diskute kona-ba introdusaun Plataforma Dijitál iha lian portugés.
“Enkontru ida ohin-ne’e ba ita importante tanba sustentabilidade ne’ebé Nasaun Unida fó mai ita barak mak la’o tiha ona. Entaun, ohin sira hosi CPLP husu ba ami kona-ba matéria Plataforma Dijitál introdús iha lian portugés iha servisu fatin. Tanba ita-nia lian ofisiál tiha mak la’o laloos, tetun mós laloos no korrespondénsia laloos hotu. Tanba ne’e mak Ministra Reforma Administrasaun liliu kona-ba Ajénsia Modernizasaun Administrativa, sira atu apoia ita iha introdusaun lian portugés,” Ministru Administrasaun Estatál, Tomás Cabral dehan ba jornalista sira iha salaun MAE, Kolmera, Dili.
Governante ne’e dehan CPLP ohin mai tanba iha objetivu atu hahú Plataforma dijitál ida. Ne’e mak ohin dehan ba sira tenke servisu hamutuk oinsá iha plataforma ida benefísiu ba rai hotu-hotu.
“Plataforma ita iha hotu ona hodi ita hatutan ba-malu. Sira-nia prezensa atu hametin katak ita mós membru CPLP. Plataforma ne’e mak dijitál lori governasaun besik ba povu. Agora Balkaun Úniku ne’e matéria ida iha munisípiu sira. Balkaun Úniku matéria ida, iha-ne’ebá iha portál munisipál, perfíl munisipiu, inklui dadus sira. Ida-ne’e mak ita diskute ho sira atu kombina dadus sira-ne’e sai ida de’it,” nia dehan.
Entretantu, Embaixadora CPLP hosi Timor-Leste, Natália Carrascalão, dehan kestaun lian portugés importante liu ne’ebé hola-parte ona iha membru CPLP no konsege iha Balkaun Úniku.
“Ida-ne’e ita mós hatudu bele. Maibé, ministru husu apoiu liu mak instrodusaun lian portugés, keta lakon língua portugeza, husu ema mai hanorin portugés iha administrasaun no eskola sira hotu,” nia esklarese.
Jornalista: Osória Marques
Editór: Xisto Freitas da Peidade
