Notariadu planeia koloka adidu permanente iha Portugál hodi fó atendimentu ba timoroan sira
DILI, 17 Agostu 2026 (TATOLI) – Ministériu Justisa, liuhusi Servisu Rejistu Notariadu tau ona planu iha Orsamentu Jerál Estadu (OJE) 2027 atu koloka adidu permanente iha Portugál hodi lori besik atendimentu ba timoroan sira trata pasaporte no atualiza dokumentu sira seluk.
Diretór -Jerál Servisu Notariadu, Agustinho Gonçalves Vieira, dehan, iha tinan 2024, Notariadu serbisu hamutuk ho Embaixada Timor-Leste iha diáspora, tau ona adidu permanente iha Reinu Unidu, Austrália ho Koreia Súl iha tinan kotuk, tanba sidadaun timoroan barak iha nasaun sira ne’e nu’udar traballadór no ba hala’o estudu, ne’ebé daudaun atendimentu la’o normal iha ne’ebá no sidadaun sira la presiza mai to’o Timór.
Nia eslika katak, ba adidu iha Reinu Unidu ne’e, halo mós atendimentu ba timoroan sira iha Portugál. “Agora, ita plaeia atu loke tan adidu ida iha Portugál hodi halo servisu atendimentu permanente iha ne’ebá”, nia hateten ba Tatoli iha Mandarin, ohin.
Dirijente ne’e espera katak, ho planu estabelesimentu ne’e, sei lori atendimentu besik liután ba sidadaun sira ne’ebé hela iha Portugál, tanba daudaun timoroan barak mak iha ne’ebá.i
Antes ne’e, Ministériu Justisa, liuhusi Embaixada Timor-Leste iha Lizboa fó sai ona avizu katak iha loron 13 até 18 Jullu fó ona atendimentu ba timoroan sira ne’ebé pasaporte kaduka. No tuir dadus, iha sidadaun na’in-300-resin mak trata sira-nia dokumentu.
Aleide ne’e, iha fulan-Janeiru to’o Juñu tinan ne’e, fó ona atendimentu renovasaun pasaporte ba sidadaun timoroan sira iha Austrália na’in-161, Reinu Unidu 1.074 no Koreia Súl 332.
Notísia relevante: Renovasaun pasaporte ba timoroan sira iha Portugál komesa semana oin
Jornalista: Nelson de Sousa
Editora: Maria Auxiliadora
