Notariadu rekolla reseita millaun $2,9 husi emisaun pasaporte
DILI, 17 Agostu 2026 (TATOLI)-Servisu Rejistu Notariadu Ministériu Justisa arrekada, entre Janeiru no Jullu 2026, reseita hamutuk millaun $2,9 ba kofre Estadu.
Diretór-Jerál Servisu Notariadu, Agustinho Gonçalves Vieira, dehan reseita sira ne’e rekolla husi atendimentu pasaporte komún, serbisu no diplomátika.
Nia dehan atendimentu ne’e la’o tuir regra, ne’ebé sidadaun sira trata pasaporte loron ida nian selu $100, loron tolu $75 no loron 14 $50.
“Agora atendimentu pasaporte ne’e barak liu mak komún. Laiha problema no ami kontinua mellora atendimentu. Daudaun laiha ema dudu-malu ona, tanba liuhusi ajendamentu online ne’ebé iha no iha pedidu emerjénsia husi sidadaun sira, liuliu pasiente moras no defisiente bele atende lalais”, nia hateten ba Tatoli iha Mandarin, ohin.
Dirijente ne’e informa katak daudaun stock kaderneta pasaporte sufisiente atu fó atendimentu, tanba iha fulan hirak liubá halo akizisaun ba kaderneta pasaporte hamutuk rihun 60.
Daudaun kontinua prosesu akizisaun no tuir planu, iha tinan oin, fulan-Fevereiru pasaporte sei to’o tan rihun 76.900-resin. “Ida-ne’e ita halo akizisaun ho orsamentu besik millaun $1”, dehan.
Lembra katak durante tinan 2025 Notariadu rekolla reseita millaun $4-resin ba kofre Estadu liuhusi atendimentu pasaporte.
Jornalista: Nelson de Sousa
Editora: Maria Auxiliadora
