Prezidente Repúblika loke Feira Livru Ró-biblioteka Doulos Hope

DILI, 17 Agostu 2026 (TATOLI) – Prezidente Repúblika, José Ramos-Horta, halo abertura ba Feira Livru Ró-biblioteka Internasionál Doulos Hope, ne’ebé hahú aban, 18 Agostu, sei loke ba públiku to’o 01 Setembru 2026.

Ramos-Horta hatete katak prezensa Ró-biblioteka Doulos Hope ne’e importante tebes, tanba bele promove kultura lee, edukasaun no asesu ba livru no rekursu literasia ba komunidade.

“Obrigadu tanba imi-nia tempu mai iha ne’e. Ha’u sempre fó importánsia ba siénsia no teknolojia, no ami halo ona inisiativa barak iha ha’u-nia gabinete halo Feira Siénsia no Teknolojia”, Ramos-Horta dehan.

Nia realsa katak atividade sira iha ró-biblioteka ida-ne’e inklui palestra kona-ba teknolojia saúde móvel, telemedisina, no teknolojia edukasionál, painel diskusaun kona-ba hametin inovasaun iha Timor-Leste, no sesaun pergunta no resposta permite estudante no profisionál timoroan sira atu envolve diretamente.

Xefe Estadu konsidera ró-biblioteka internasionál ne’e sei fó oportunidade ba foinsa’e sira atu aumenta interese lee, tanba Feira Livru ne’e oferese konteúdu oioin ne’ebé di’ak ba vizitante sira, liuliu ba labarik sira.

Diretora Doulos Hope, Trizinia September, agradese ba Governu Timor-Leste nia tanba kooperasaun no parseria ne’ebé halo vizita ida-ne’e bele realiza.

“Ha’u bele dehan katak ida-ne’e mak ha’u-nia vizita datoluk mai Timor-Leste. Ha’u hanoin hikas katak durante vizita 2008, ha’u mós iha ami-nia ró anteriór, Doulos. Ha’u iha memória furak tebes kona-ba vizita dahuluk ne’ebá”, nia relembra.

Tuir nia, sira-nia vizita ikus liu iha Janeiru 2026, bainhira Doulos Hope halo nia vizita inaugurál iha Dili. Ekipa Doulos Hope sente orgullu tebes tanba ema barak ne’ebé vizita feira livru no tuir atividade sira.

“Ami hanoin liuliu númeru boot husi joven sira ne’ebé mai iha ró laran hodi esplora Feira Livru nian, hasoru tripulasaun, no kria memória sira ne’ebé dura hamutuk liuhusi fotografia sira ne’ebé sura labele. Ami-nia ekipa barak mós ba rai-maran loroloron hodi esperiénsia no envolve kle’an liután ho komunidade lokál. Tanba enkontru sira ne’ebé signifikativu no amizade sira ne’ebé manas, ami kontente tebes atu filafali”, dehan.

Nia esplika Doulos Hope signifika “Atan Esperansa nian”, no ró foun liu iha frota globál, ne’ebé lori misaun atu fahe koñesimentu, tulun, no esperansa iha portu hothotu ne’ebé vizita.

Iha ró laran, iha ekipa multikulturál ho voluntáriu liu 100 husi nasaun 37, ne’ebé unidu husi objetivu komún atu fahe koñesimentu, tulun no esperansa ba komunidade sira. “Ami halo ida-ne’e liuhusi ami-nia Feira Livru flutuante, programa sira interkámbiu kulturál nian, inisiativa edukasionál sira, no envolvimentu komunitáriu ne’ebé signifikativu. Ita hafolin mandamentu atu hadomi Maromak ho ita-nia laran, neon no klamar tomak, no hadomi ita-nia maluk hanesan ita-nia an rasik”, Trizinia subliña.

Tanba ne’e, sira tama iha portu idaidak ho postura servisu nian, hodi serbisu hamutuk ho komunidade lokál sira no fahe mensajen esperansa nian.

“Iha ami-nia misaun nia fuan maka fiar katak esperansa la’ós buat ida ne’ebé dook; ida-ne’e maka buat ida ne’ebé ita bele hili atu fahe loroloron iha maneira ki’ik no intensionál sira. Karik ida-ne’e konversa ida ne’ebé enkoraja, rekursu ida ne’ebé ekipa, ka momentu ligasaun ida ne’ebé fó hanoin ba ema ida katak sira la mesak. ASmi fiar katak interasaun hothotu iha potensiál atu hamosu mudansa pozitiva”, katak.

Tuir nia, Timor-Leste nia nasaun koñesidu ho nia paizajen naturál sira ne’ebé furak, istória ne’ebé riku, no ema sira ne’ebé reziliente. Durante sira-nia estadia badak iha fulan-Janeiru, hahú aprende liután kona-ba istoria, perseveransa, no rikeza kultura Timór nian.

“Nu’udar komunidade Doulos Hope, ami hein atu aprende buat barak liután husi ita-boot durante vizita ida-ne’e. Ho maneira ida-ne’e, koñesimentu fahe bainhira ita aprende liután kona-ba sé maka ita-boot no saida maka ita-boot valoriza. Nu’udar amizade sira forma entre ita-boot no ami, ami hein atu troka ami-nia istória esperansa nian ba malu. Ami hatene katak, maski ho ami-nia intensaun di’ak liu atu serbí hamutuk ho ita-boot sira, ami labele halo buat hotu mesak”, hatete.

Iha fatin hanesan, joven timoroan, Eafet Marcahal, ne’ebé sai voluntáriu ba Feira Livru husi Ró-biblioteka Internasionál Doulos Hope, sente orgullu tanba iha feira ne’e livru sira ho tipu oioin ne’ebé nakonu ho motivasaun.

“Hanesan foinsa’e presiza lee barak tanba liuhusi lee mak sai pontu importante atu hatene buat barak. Entaun, prezensa ró ne’e ne’e iha vantajen boot ba joven sira ne’ebé hakarak lee no hatene. Husu ba maluk sira hatoman-an lee beibeik no bele mai vizita fatin ne’e”, nia sujere.

Livru sira ne’ebé fa’an iha feira ne’e iha konteúdu oioin, inklui livru motivasaun moris nian, aiknanoik, no konteúdu ba labarik sira, ho totál rihun rua-resin. Folin livru hahú husi $0.63 to’o $25.

Feira livru ne’e loke ba públiku kada loron, hahú hsi tuku 10:0h0 dadeer to’o tuku 17h00, no sei kontinua to’o 01 Setembru 2026.

Jornalista: Arminda Fonseca 

Editora: Maria Auxiliadora