Xefe Suku Irabin de Baixo triste lakon joven ida-ne’ebé oknun PNTL tiru

VIKEKE, 17 Agustu 2026 (TATOLI)—Xefe Suku Irabin de Baixo, Postu Administrativu Uatukarbau, Munisípiu Vikeke, José Baptista do Carmo, informa vítima Silvano Gomes ho idade 30 husi Aldeia Taradai, Suku Irabin de Baixo, Postu Uatukarbau, Munisípiu Vikeke ne’ebé oknum Polísia Nasinál-Timor Leste (PNTL) ida husi Eskuadra Uatukarbau tiru foin lalais iha loron Sábadu (15/08) hakotu ona iis iha Hospital Nacional Guido Valadares (HNGV), Dili, Segunda ne’e.

“Ohin ha’u simu ona kontaktu husi vítima Silvano nian maun informa ba ha’u katak vítima hakotu ona iis iha dadeer tuku 8:30. Nune’e, daudaun ne’e, mate-isin iha ona mortuáriu HNGV Dili. Ha’u sente triste boot tanba lakon ha’u-nia joven ida iha Suku Irabin de Baixo,” José Baptista do Carmo ba TATOLI iha Postu Vikeke Vila, Segunda ne’e.

Notísia relevante: http://Oknum PNTL tiru abitante, Xefe Suku Irabin husu reforsa formasaun kona-ba uza arma 

Autoridade ne’e dehan hafoin simu tiha novidade tristeza, autoridade suku orienta kedas xefe aldeia Taradai bá Eskuadra PNTL hodi koordena sira, maibé xefe aldeia bá Komadante Eskuadra laiha fatin.

“Bainhira ha’u rona tiha novidade tristeza ida-ne’e, iha dadeer kedas ha’u haruka xefe aldeia ba eskuadra, maibé komadante laiha. Membru PNTL sira dehan asuntu ne’e komadante mak hatene. Nune’e, xefe aldeia filafali de’it. Objetivu xefe aldeia ba eskuadra ne’e atu halo koordenasaun, atu mate-isin mai karik ita bele asegura ba estabilidade,” José informa.

Kona-ba estabilidade, nia hatutan, fó ona orientasaun ba sekretáriu suku hodi hatutan ba xefe aldeia sira hodi fó-hatene ba komunidade bainhira mate-isin mai garante estabilidade.

José tenik daudaun ne’e família matebian sira komesa servisu prepara prosesu fúnebre nian iha vítima nia rezidénsia, Aldeia Taradai.

Aleinde ne’e, nia husu Autoridade PNTL tenke investiga suspeitu ba kazu tiru joven ne’e ho loloos. “Ami husu ba parte investugasaun tenke investiga loloos, tanba povu ne’e ninia garantia mak parte seguransa. Seguransa viola fali lei entaun povu ne’e garante fali ba sé,” nia subliña.

Kona-ba mate-isin nia, nia esplika, mate-isin oras-ne’e sei iha mortuariu HNGV, probabilidade aban (18/08) mak foin sai husi Dili lori mai Suku Irabin de Baixo.

Iha fatin ketak, Pesoal Saúde Internamentu Vikeke Vila ho inisiál JCS, haktuir vítima dezloka bá Sentru Saúde Internamentu Vikeke iha dadeer, maibé kondisaun grave nune’e médiku sira halo karta transferénsia iha loron 15 Agostu tuku 10:00 ho aviaun lori bá Dili.

“Momentu ne’e vítima to’o iha Sentru Saúde Intermentu Vikeke, pesoal saúde sira observa nia kondisaun grave ho kabun bubu maka’as, raan sai barak no dada iis araska, depoiz pesoal saúde monta oksijéniu no médiku halo karta transferénsia lalais hodi enkamiña bá Dili ho aviaun,” nia hateten.

Entretantu, kazu oknum PNTL tiru matebian akontese iha Postu Uatukarbau iha tuku 8:00 Otl, tiru vítima iha parte kabun to’o borus.

Jornalista: Vitorino Lopes da Costa

Editóra: Xisto Freitas de Piedade