ME-Emiradu Árabe Unidu diskute projetu edukativu

DILI, 17 Agostu 2026 (TATOLI)—Governu liuhusi Ministériu Edukasaun (ME) no Embaixada Emiradu Árabe Unidu (UAE) iha Jakarta, Segunda ne’e, diskute kona-ba projetu edukativu ne’ebé envolve estudante sira husi Timor-Leste atu prodús vídeo kona-ba ambiente biotika hanesan iha ai-horis ne’ebé fó matak ba eskola.

Dulce de Jesus hatutan projetu ne’e hetan apoiu husi Embaixada Emiradu Árabe Unidu no envolve kompetisaun vídeo, ne’ebé sei pasa liuhosi prosesu selesaun no avaliasaun antes fó prémiu ba vídeo sira ne’ebé konsidera di’akliu.

“Tanba ne’e, husi diskusaun ohin Embaixada Árabe husu ba Ministériu Edukasaun ba futuru atu iha kooperasaun iha área edukasaun nian. Depoiz tempu oin-mai, ita sei espresa tan saida mak Ministériu Edukasaun ho Emiradu Árabe atu halo kooperasaun iha futuru,” Ministra Edukasaun dehan ba jornalista sira iha Palásiu Governu, Segunda ne’e.

Iha fatin hanesan, Adjunta Xefe Misaun Embaixada Emiradu Árabe Unidu iha Jakarta, Shaima Salem AlHebsi, apresia Governu Timor-Leste tanba bele servisu hamutuk ho Árabe ba iha área edukasaun nian.

AlHebsi subliña nia parte kontente tebes tanba bele vizita Timor-Leste no hasoru Ministra Edukasaun ba primeiravéz.

“Timor-Leste mak nasaun amigável no ami apresia apoiu ne’ebé Timor-Leste fó. Ami mai iha vizita amigável ida tan, no mós atu selebra projetu estudante sira-nian ne’ebé ita servisu hamutuk,” nia hateten.

Nia espera atu iha tan kooperasaun no projetu bilaterál iha futuru, liliu entre estudante sira husi Timor-Leste no Emiradu Árabe Unidu, inklui oportunidade ba estudante sira atu aprende no servisu hamutuk.

Reprezentante Embaixada Emiradu Árabe Unidu mós apresia apoiu Ministériu Edukasaun ba implementasaun prinsípiu fraternidade umana iha eskola sira iha Timor-Leste.

Salem konsidera inisiativa ne’e hanesan ezemplu ida-ne’ebé hatudu vizaun komún entre nasaun rua atu promove prosperidade, toleránsia no komprensaun entre povu sira.

Parte rua mós diskute kona-ba faze implementasaun projetu iha tinan dahuluk no posibilidade atu kontinua no haburas kooperasaun iha futuru.

Kooperasaun ne’e sei fó-atensaun ba oportunidade foun iha área edukasaun, inklui inisiativa sira ne’ebé bele hametin interasaun, aprendizajen no interkámbiu entre estudante sira husi Timor-Leste no Emiradu Árabe Unidu.

Jornalista: Osória Marques

Editór: Xisto Freitas da Piedade