Empreza Oseanu sei halo manutensaun ba mákina CT Scan iha HNGV

DILI, 18 Agostu 2026 (TATOLI)—Diretór Servisu Apoiu Diagnóstiku no Terapéutiku HNGV, Vidal de Jesus Lopes, hateten Empreza Oseano mak sei halo manutensaun CT Scan iha HNGV ne’ebé avaria.

“Loos duni mákina CT Scan ne’e avaria duni, maibe iha ona soluasaun mak aban tékniku sira to’o Timor-Leste. Empreza ne’ebé atu halo manutensaun mak husi Empreza Internasionál Oseanu,” Vidal Lopes dehan ba jornalista sira iha HNGV, ohin.

HNGV mós iha ona planu tinan ne’e atu sosa foun mákina Ct Sca  foun nune’e iha fulan oin ka iha Setembru mákina ne’e rasik sei to’o Timor-Leste.

“Solusaun mak tinan ida-ne’e tau ona osan no empreza manán-na’in mak fornesedor mákina foun Ct Scan iha ona no tentativamente 30 Setembru fulan oin mak mákina foun foin tama mai. Signifika mákina foun tama ita iha mákina Ct Scan iha rua nia kapasidade ne’ebé mak la hanesan mákina tuan ne’e nia kapasidade. CT Scan 64 slice depois Ct Scan foun ne’ebé mak atu mai 128 slice  entaun ita iha mákina rua ne’ebé mak sei konsentra hotu iha HNGV,” nia afirma.

Vidal dehan, banhira mákina ne’e avaria médiku sira iha meis diagnostiku ba pasiente sira, tanba la maioria pasiente sira presiza CT Scan maibe iha ida-rua mak presiza nune’e médiku sira buka solusaun hodi rezolve problema ne’e.

“Bainhira mákina Ct Scan avaria ita-nia médiku sira iha meiu diagnostiku tanba maioria la’ós pasiente hotu-hotu mai atu halo Ct Scan. Maibé iha balun ne’ebé mak indikasaun mak halo Ct Scan. Bainhira Ct Ccan avaria, ita bele halo liu husi M-ray ka X-ray,” nia relata.

Mákina foun ne’ebé mak atu mai ne’e sosa ho osan husi OJE 2026 hamutuk millaun $1,1 kona-ba sosa nasaun ne’ebé ne’e husi parte aprovizionamentu mak apar liu.

Antes ne’e, Ministra Saúde Élia dos Reis Amaral hateten kona-ba mákina CT- Scan ne’ebé mak daudaun iha Hospitál Nasionál Guido Valadares, kuaze tinan neen nia laran ona nune’e bele avaria.

“Ita mós iha tinan ita hola ona mákina CT Scan ne’ebé sei prosesu mai, atu nune’e bele troka fali ho mákina foun ne’e. Maibé barak mak ita hatene reazente laiha, maibé ita tempu badak nia laran, ita sei monta CT-Scan foun ne’ebé mak ita aloka husi orsamentu 2026 nian,” nia hateten.

Jornalista  : Felicidade Ximenes

Editór         : Cancio Ximenes