Estrada rurál iha Sagadate tinan-rua ona seidauk finaliza
BAUKAU, 17 Agostu 2026 (TATOLI)—Progresu reabilitasaun estrada rurál ne’ebé lokaliza iha Suku Sagadate, Postu Administrativu Laga, Munisípiu Baukau, tinan-rua ona seidauk finaliza.
Xefe Suku Sagadate, Aureliano de Jesus, esplika estrada iha diresaun referida hamutuk pakote tolu ho totál kilómetru ualu responsabiliza husi kompañia tolu ne’ebé hahú obra husi tinan-2023 no 2024 maibé to’o atualmente seidauk finaliza iha-ne’ebé tuir kontratu ramata iha tinan-2025.
“Ami informa nafatin ba Obras Publikas atu fó atensaun ba sira, maibé ida kompanhia Lamegua ne’e fulan neen resin ona laiha terrenu halo servisu,” Aureliano de Jesus liuhusi telefonema, Segunda ne’e.
Aureliano de Jesus, relata projetu tolu referida implementa serbisu ho tipu ateru, cór betaun, konstrusaun ponte no valeta hahú husi Aldeia Aburi to’o Serebu’u ne’ebé MOP selebra kontratu ho Kompañia Rozi Unipessoal, Lda, responsabiliza iha pakote dahuluk totál distánsia kilómetru 2.15 ho valór orsamentu $469.477,40.
Seluk, kompañia Sicola Unipessoal Lda serbisu iha pakote daruak totál kilómetru rua (2)-resin ho valór orsamentu $448.715,07 no pakote datoluk responsabiliza husi datoluk no dahaat iha-ne’ebé konsideradu seidauk iha progresu.
“Pakote dahuluk agora serbisu la’o hela maibé kle’ur ona. Pakote segundu Sicola kaer ne’e mós la’o daudaun (drenajen hotu ona), sira atu ateru ona. Enkuantu, pakote datoluk no dahaat to’o agora lori hela de’it rai henek ba maibé seidauk servisu,” Aureliano de Jesus akresenta.
Notisia relevante : http://Projetu estrada rurál pakote 11 iha Baucau sei reabilita tinan ne’e
Líder autoridade lokál ne’e husu MOP atu fó-atensaun ba kompañia responsavel atu aselera obra iha lokál tanba nesesita ba komunidade uma-kain 100-resin husi aldeia rua ne’ebé enfrenta problema estrada liuliu asesu ba merkadu no bainhira infrenta moras emérjensia.
Iha fatin seluk, Koordendór Tékniku Destakadu Obra Públika Munisipiu Baukau, Diego Cipriano Caleza rekoñese progresu fíziku projetu reabilitasaun estrada rurál iha Sagadate no parte tékniku relata ona relatóriu ba nasionál inkluindu pakote datoluk no dahaat ne’ebé responsabiliza husi Lamegua Unipessoal, Lda.
“Dadus sira husi ita-nia parte haruka ona, atu oinsa, ne’e desizaun nasionál nian,” Diogo Caleza hateten.
Jornalista: Natalino Belo
Editór: Xisto Freitas da Piedade
