Falur konsidera Selebrasaun Loron FALINTIL ba da-51 reafirma juramentu
BAUKAU, 18 Agostu 2026 (TATOLI)—Xefe Estadu Maiór Jenerál FALINTIL-FDTL, Tenente Jenerál Falur Rate Laek, konsidera Selebrasaun Loron Nasionál FALINTIL ba da-51 (20 Agostu 1975-20 Agostu 2026) sai momentu tranzisaun no reafirma juramentu bazeia ba tema “Onra ba Mártir, Kompromisiu ba Estabilidade no Pás”.
Falur hateten misa agradesimentu ne’e nu’udár reafirma juramentu ba pás no estabilidade bazeia ba tema aniversariu tinan-ne’e liuliu realiza iha fatin istóriku nu’udár rekoñesimentu ba istória, eroi no martir ne’ebé mate ba luta libertasaun nasionál.
“Ne’e-hola parte iha pakote tranzisaun, ilustrasaun, restaura memória luta no konsensializasaun sira atu fortalese instituisaun no formasaun,” Tenente hateten hafoin ramata partisipa misa agradesimentu ba loron FALINTIL iha Igreja Pro Katedrál Vila Antiga, Baukau, Tersa ne’e.
Eis komandante Falintil ne’e relata, aktividade selebrasaun loron nasionál FALINTIL ne’e hahú marsa ho objetivu rekonsiliasaun hodi hamoris memória erói sira ba jerasaun foun liuliu membru Falintil-FDTL.
Aleinde ne’e, selebrasaun loron importante ne’e sai momentu tranzisaun jerasionál, ilustrasaun restaura memória luta no konsensializasaun hodi hametin instituisaun liuhusi formasaun bazeia ba tema jerál ne’ebé iha.
Iha fatin hanesan, Selebrante Misa Aniversária, Padre Manuel Ximenes, SDB, hato’o agradese ba Maromak liuhosi misa agradesimentu hodi Selebra Loron Nasionál FALINTIL ba da-51 liuliu reziste no luta durante tinan 24 to’o Timor-Leste hetan libertasaun nasionál.
“Agradese ba Maromak nune’e ba sira-ne’ebé sei moris bele forsa nafatin no ne’ebé lakon vida nafatin tau-matan ba ita nune’e bele hetan matak-malirin liuliu pás no estabilidade iha ita-nia rai,” Padre informa.
Nia husu eis FALINTIL sira kontinua tau an nu’udár veteranu no evita envolve iha organizasaun politika tanba sofremintu no terus sira-ne’ebé utrapasa hakarak aliserse nasaun kontinua metin ba nafatin.
Amu Manuel hatutan membru FALINTIL-FDTL presiza haraik an no banati tuir FALINTIL sira hanesan iha espíritu nasionalizmu hodi sai defeza ba nasaun liuliu garante pás no estabilidade iha Timor-Leste.
Entretantu, partisipa iha misa kompostu husi Xefe Estadu Maiór Jenerál FALINTIL-FDTL, Tenenti Jenerál Falur Rate Laek, Xefe Estadu Maiór FALINTIL-FDTL, Brigadeiru Jenerál José da Costa ‘Trix, Eis Ministru Defeza, Filomeno Paixão, Ministra Edukasaun, Dulce de Jesus Soares, Prezidente Autoridade Munisípiu Baukau, Veneranda Eurico Lemos Martins, PAM Vikeke, Superiór PNTL, Membru F-FDTL, estudante no komunidade.
Serimónia nasionál FALINTIL ba da-51 sei realiza iha Foho Matebian, área Sobasula, Suku Abu, Postu Administrativu Matebian iha-ne’ebé sei realiza ho isár bandeira iha loron Kinta (20/08/2026).
Jornalista: Natalino Belo
Editór: Xisto Freitas da Piedade
