Iha Komité Revizaun Polítika, MNEK aprezenta estimasaun millaun $10
DILI, 18 Agostu 2026 (TATOLI)—Ministériu Negósiu Estranjeiru no Kooperasaun liuhusi Vise-Ministra ba Asuntu ASEAN, Milena Rangel, hateten iha Komité Revizaun Polítika (KRP) nian ne’e MNEK aprezenta estimasaun proposta Polítika Prioridade Governu (PPG) husi sub-komité hamutuk millaun $10.
Vise-Ministra ba Asuntu ASEAN, Milena Rangel, hateten ohin sira aprezenta kona-ba polítika prioridade Governu (PPG) nia preparasaun orsamentu ba tinan 2027 to’o 2029 ne’ebé Timor-Leste sei sai Prezidénsia ASEAN.
“Ita presiza prepara duni orsamentu ne’ebé aloka ba 2027 no atividade saida de’it ba 2028 ho ninia montante,” Vise-Ministra, Milena Rangel, informa ba jornalista sira iha Ministériu Finansa Aitarak laran, ohin.
Maibé, nia dehan, sira simu orientasaun husi Primeiru-Ministru katak ita foka uluk lai planu 2027 ba setór importante hanesan, infraestrutura, kapasitasaun institusionál, rekursu umanu no seluk tan ne’ebé eziste no sub-komité sira hodi responde ba kada setór.
“Kona-ba orsamentu nian ita tenke halo revizaun montante finál no estimasaun purvolta millaun $10 ne’ebé ami tenke halo ezersísiu uitoan atu haree katak planu ida-ne’ebé mak refleta duni ba 2027,” nia dehan.
Nune’e, nia dehan, atu refleta lolós nia intensaun husi sub-komité sira katak servisu saida mak ita presiza finaliza iha 2027, tuir mai mak foin haree fali planu servisu 2028 nian.
Kona-ba orsamentu nian ita tenke halo revizaun montante finál no estimasaun purvolta millaun $10 ne’ebé ami tenke halo ezersísiu uitoan atu haree katak planu ida-ne’ebé mak refleta duni ba 2027.
Enkuantu sub-komité kompostu husi servisu integradu ministériu sira hetan, MD, MI, MF, MJDAK, ME, entaun ami sei iha konfirmasaun lolós atu ministériu idaidak bele identifika ninia planu prioridade hodi submete fali proposta finál ba KRP.
Jornalista : Alexandra da Costa
Editór : Cancio Ximenes
