Komisaun B husu investigasaun kle’an ba oknun PNTL ne’ebé tiru sidadaun iha Vikeke
DILI, 18 Agostu 2026 (TATOLI)-Deputadu Komisaun B Parlamentu Nasionál, ne’ebé trata Asuntu Negósiu Estranjeiru, Defeza no Seguransa, David Dias Ximenes ‘Mandati’, solisita ba entidade relevante atu halo investigasaun kle’an kona-ba oknun Polísia Nasionál Timor-Leste (PNTL) husi Seksaun Tránzitu iha Postu Administrativu Uatukarbau, Munisípiu Vikeke, ne’ebé tiru mate sidadaun ida ho naran Silvino Gomes.
Sidadaun ne’e hetan tiru iha Domingu (16/08), pur volta tuku 09h00 dadeer. Hafoin ne’e, lori kedan bá ospitál Vikeke, antes transporta ho aviaun mai Dili hodi hetan tratamentu iha Ospitál Nasionál Guido Valadares (HNGV).
Vítima to’o iha HNGV iha tuku 13h00 no, iha tuku 16:00 to’o tuku 20h00 médiku sira halo operasaun ba nian hodi hasai bala-musan iha nia isin.
Tuir informasaun, kondisaun vítima grave tanba bala-musan borus husi kotuk mai iha oin. Hafoin operasaun, vítima hakotu ona iis.
Tuir kronolojia kazu ne’e, vítima momentu lori motór no la uza kapasete mak oknum PNTL husi Seksaun Tránzitu tiru nia.
Mandati lamenta ho aktu ne’ebé akontese no konsidera tenke halo investigasaun kle’an atu hatene motivu loloos no prosesa tuir lei ne’ebé iha.
“Filozofia polísia mak vizibilidade. Sira tenke haree iha fatin hothotu. Envolvimentu polísia ho populasaun mak pás no profisionalizmu”, nia hatete.
Deputadu husi bankada Frente Revolusionária Timor-Leste Independente (FRETILIN) ne’e dehan situasaun hanesan ne’e bele akontese tanba falta kontrolu husi superiór sira.
Nia rekomenda ba Governu atu kontinua aposta ba formasaun membru PNTL sira, liuliu atu hasa’e koñesimentu no kapasidade kona-ba utilizasaun arma fogu, nune’e sira bele hala’o knaar ho responsabilidade no tuir prosedimentu legál.
Notísia relevante: https://tatoli.tl/2026/08/17/silvino-gomes-neebe-hetan-tiru-husi-oknum-pntl-hakotu-ona-iis/
Jornalista: Nelson de Sousa
Editora: Maria Auxiliadora
