KRP husu CNE-STAE-MNEK atu halo ajustamentu hodi evita dupla iha PPG
DILI, 18 Agostu 2026 (TATOLI)-Komisaun Revizaun Polítika (KRP) deside Komisaun Nasionál Eleisaun, Sekretariadu Tékniku Administrasaun Eleitorál no Ministériu Negósiu Estranjeiru Kooperasaun, presiza halo ajustamentu Planu Prioridade Governu (PPG) atu labele dupla iha implementasaun.
Koordenadór-Jerál Gabinete Ministru Koordenadór ba Asuntu Ekonómiku (MKAE), Jorge Rui de Carvalho Martins, hateten ohin iha Komité Revizaun Polítika (KRP) ko’alia kona-ba Polítika Prioridade Governu (PPG) iha presaun polítika foun ne’ebé seidauk hetan finansiamentu.
“Ita haree katak tinan oin sei iha eleisaun prezidensiál no elisaun parlamentár inklui mós iha eleisaun munisipál suku sira,” Koordenadór MKAE ne’e hateten ba jornalista sira iha Ministériu Finansa, Aitarak Laran, ohin.
Tanba, nia dehan, entidade ne’ebé tuir polítika Ministériu Finansa fó fiar ba MKAE atu lidera maka CNE, STAE, MNEK no MSSI, entaun ohin sira deside ona katak CNE, STAE ho MNEK nia proposta mak sei lori ba halo ajustamentu, hafoin hotu tiha mak lori fila-fali ba aprezenta iha KRP hodi hetan aprovasaun.
Aleinde proposta hotu presiza halo ajustamentu liuliu ba iha prosesu eleisaun, resensiamentu, tanba iha duplikasaun ruma iha esplikasaun entre MNEK ho STAE nian, entaun tuir Primeiru-Ministru katak Janeiru to’o Marsu eleisaun ona, entaun reseensiamentu la to’o.
“Maibé hafoin halo konfirmasaun husi STAE katak resensiamentu sira halo tiha ona, fulan-Outubru sira kontinua nafatin to’o Dezembru, nune’e fulan-Janeiru to’o Fevereiru prepara ba eleisaun de’it ona. Tanba ne’e mak sira tenke konfirma ba malu atu númeru labele dupla,” nia esplika.
Tanba, nia hateten, durante ne’e orsamentu duplikasaun ne’e barak, entaun tinan ida-ne’e ba oin sira hahú implementa orsamentu bazeia ba polítika prioridade Governu, katak Ministériu hotu-hotu tenke tuur hamutuk hodi haree to’ok duplikasaun no ita integra atu apoiu malu.
Enkuantu iha Polítika Prioridade Governu da-sia (IX) CNE sira propoin estimasaun orsamentu hamutuk millaun $10, STAE propoin purvolta millaun $10 no MNEK mak husu millaun $2-resin ba resensiamentu eleisaun.
Jornalista : Alexandra da Costa
Editór : Cancio Ximenes
