Shaima Dalen atualiza preparasaun vizita MNEK Emiradu Árabe Unidu iha TL
DILI, 18 Agostu 2026 (TATOLI)—Adjuntu Xefe Misaun Embaixada Emiradu Árabe Unidu iha Jakarta, Shaima Dalen Aihebsi, hala’o enkontru ho Primeiru-Ministru, Kay Rala Xanana Gusmão, hodi atualiza preparasaun vizita Ministru Negósiu Estranjeiru Nour al-Kaabi iha Timor-Leste.
Adjuntu Xefe Misaun Embaixada Emiradus Árabe Unidu iha Jakarta, Shaima Dalen Aihebsi, hateten enkontru ida ohin ho objetivu atu atualiza preparasaun vizita husi Ministru Negósiu Estranjeiru Emiradu Árabe Unidu, Nour al-Kaabi, iha Timor-Leste meadu fulan-Agostu nia laran.
“Ida-ne’e sei sai vizita nivel aas dahuluk husi Emiradu Árabe Unidu ba Timor-Leste iha nivel ministeriál hodi hatudu katak Governu Emiradu Árabe Unidu iha interese boot no hakarak tebes atu aprofunda amizade no relasaun entre ita-nia nasaun rua,” Xefe Adjuntu ne’e informa ba jornalista sira iha Palásiu Governu, ohin.
Tanba ne’e, nia dehan, sente kontente tebes tanba bele hasoru malu ho Primeiru-Ministru, Kay Rala Xanana Gusmão, ho ninia personalidade ne’ebé estraordináriu.
“Nia simu ami ohin, no ami halo diskusaun ne’ebé produtivu tebes, ne’ebé ami ko’alia kona-ba área oioin ne’ebé ita bele hadi’a tan relasaun bilaterál entre ita-nia nasaun rua,” nia dehan.
Aleinde ne’e, nia hatutan, sira mós diskute kona-ba perspetiva no oportunidade potensiál iha projetu sira-ne’ebé sira hein katak bele konkretiza iha futuru.
Jornalista : Alexandra da Costa
Editór : Cancio Ximenes
