TL-Kabu Verde diskute kooperasaun bilaterál
DILI, 18 Agostu 2026 (TATOLI)—Ministru Negósiu Estranjeiru no Defeza Nasionál Cabo Verde, Manuel Amante da Rosa, tersa ne’e, iha Palásiu Prezidensiál Nicolau Lobato, Bairru Pite, Dili, hasoru Prezidente Repúblika, José Ramos-Horta, hodi diskute kona-ba kooperasaun bilaterál.
Iha enkontru ne’e, nia dehan, vizita ne’e obrigatóriu tanba nia admira tebes Prezidente Ramos-Horta ne’ebé nia koñese dezde 1981.
“Foin simu ha’u husi Prezidente Repúblika, José Ramos-Horta, vizita obrigatóriu ida, nia ema ida ne’ebé ha’u admira tebes ne’ebé ha’u koñese dezde 1981. Tanba ne’e, ami servisu hamutuk iha Nasoins Unidas, no ho orgullu boot mak ohin ha’u iha ne’e simu nia nu’udar Prezidente Repúblika,” Ministru ne’e dehan ba jornalista sira hafoin remata enkontru ho Xefe Estadu.
Nia subliña katak, relasaun entre Cabo Verde no Timor-Leste hahú antes nasaun rua ne’e hetan independénsia.
To’o ohin loron nasaun rua sai nasaun soberanu ne’ebé komanda respeitu iha nível sub-rejiaun.
“Ita-nia relasaun ho Timór antesede formasaun Repúblika nasaun rua ne’e nian. Ita nasaun soberanu rua, nasaun rua ne’ebé komanda respeitu iha nível sub-rejiaun ne’ebé ita hela ba,” nia afirma.
Ministru ne’e dehan, iha kampu kooperasaun ne’ebé luan tebes entre nasaun rua. Iha sentidu ne’e nia lori ba Prezidente Ramos-Horta posibilidade balun atu aprofunda no diversifika liután relasaun sira entre Cabo Verde no Timor-Leste.
“Ami sei konsidera tebes posibilidade atu kontinua iha dalan ida-ne’e ne’ebé bele hakbesik liután povu timoroan no povu kabu-verdianu,” nia dehan.
Jornalista : Hortêncio Sanchez
Editór : Cancio Ximenes
