EAU no Tatoli esplora kooperasaun iha área komunikasaun sosiál
DILI, 18 Agostu 2025 (TATOLI) – Xefe-Adjunta Misaun Embaixada Emiradu Árabe Unidu (EAU) iha Jakarta, Shaima Salem AlHebsi, hasoru malu ho Konsellu Diretivu Ajénsia Notisioza Timor-Leste Tatoli, I.P, hodi aborda oportunidade kooperasaun iha área komunikasaun sosiál.
Vise-Prezidente ba Asuntu Administrasaun no Finansa Tatoli, I.P., Madalena P. Carlos, afirma katak objetivu husi vizita ne’e mak estabelese kooperasaun ho Tatoli iha futuru.
Tuir Madalena Carlos, EAU la haree Tatoli hanesan órgaun komunikasaun sosiál ida iha ámbitu rejionál ASEAN de’it, maibé sira hakarak Tatoli kontribui ba divulgasaun iha sira-nia mundu ne’ebá nian.
“Ohin sira mai ne’e, antes asina nota entendimentu ho Tatoli, iha Agostu sira sei iha serimónia boot ida nivel aas iha Timór kona-ba realizasaun relasaun amizade. Tanba ne’e, sira hakarak konvida Tatoli partisipa iha sira-nia atividade ne’e. Sira hakarak estabelese kooperasaun iha mídia nian”, Madalena Carlos hatete iha Faról, ohin.
Tuir nia, EAU hakarak estabele kooperasaun ho Tatoli, liuhusi sira-nia embaixada iha Jakarta, tanba embaixada ne’e mak reprezenta EAU iha Timor-Leste.
Madalena esplika sira presiza tebes halo kooperasaun tanba sira hatene foin lalais akontese funu iha Médiu Oriente, Timor-Leste mós fó solidariedade maka’as, liuliu Tatoli nafatin fó sai informasaun sira kona-ba funu iha ne’ebá.
Tuir Madalena, kooperasaun iha setór mídia sai oportunidade ba Tatoli, tanba daudaun ne’e Tatoli kontinua habelar ninia parseria ho ajénsia internasionál sira hanesan ho Xina, Malázia no seluk tan.
Xefe-Adjunta Misaun EAU iha Jakarta, Shaima Salem AlHebsi, kontente tanba bele vizita Tatoli no haree oportunidade sira atu hametin liután kooperasaun no relasaun iha área mídia nian.
“Razaun prinsipál ha’u vizita ita-boot sira-nia nasaun ne’e furak. Ida-ne’e hanesan vizita ida ne’ebé signifikante tebes tanba ida-ne’e vizita nivel militár dahuluk husi Emiradu Árabe Unidu mai Timor-Leste. Ida-ne’e hatudu katak EAU interese atu hametin hametin relasaun ho Timor-Leste”, nia dehan.
Nia parte agradese ba Tatoli nu’udar ajénsia ofisiál Estadu nian no husu Tatoli bele apoia sira-nia enkontru nivel aas kona-ba relasaun amizade nian ne’ebé sei realiza iha fulan ne’e.
“Ami sei arranja hela lojístika sira, tanba ami mak sei sai na’in ba atividade ne’e. Resesaun ida-ne’e sei partisipa husi ofisiál Governu nivel aas sira. Ami halo inisiativa ida ho ministériu Edukasaun Timor-Leste, iha ne’ebé ami hala’o kompetisaun ida entre estudante sira iha eskola, ne’ebé sira prodús filme kona-ba oinsá sira haree Timor-Leste husi sira-nia matan rasik”, dehan.
Nia subliña katak rezultadu no prémiu ba kompetisaun ne’e sei fó sai iha eventu nivel aas kona-ba relasaun amizade entre EAU no Timor-Leste.
Jornalista: Arminda Fonseca
Editora: Maria Auxiliadora
