Xefe Estadu hato’o sentidu kondolénsia ba ema-ne’ebé mate tanba rai-nakdoko iha Flores
DILI, 18 Agostu 2026 (TATOLI)—Prezidente Repúblika José Ramos-Horta, hato’o ninia sentidu kondolénsia kle’an ba Governu no povu Indonézia ne’ebé mate tanba rai-nakdoko katastrófiku akontese iha illa Flores foin lalais ne’e.
Rai-nakdoko ne’e rezulta ema barak mate, kanek no destruisaun ne’ebé boot ba uma, fasilidade saúde, eskola no infraestrutura krítiku sira.
Iha karta formál ida-ne’ebé dirije ba Prezidente Repúblika Indonézia, Prabowo Subianto Djojohadikusumo, iha loron 18 fulan-agostu 2026, Prezidente Ramos-Horta espresa tristeza kle’an kona-ba dezastre ne’ebé desloka ema rihun ba rihun.
“Ha’u hakarak hato’o ba Sua Exelénsia ha’u-nia sentidu kondolénsia ne’ebé kle’an no hato’o profunda solidariedade Timor-Leste nian ba família sira-ne’ebé lakon sira-nia ema ne’ebé sira hadomi, nune’e mós ba sira hotu ne’ebé afetadu husi dezastre trájiku ida-ne’e,” Prezidente Ramos-Horta hateten iha karta ne’e.
Nia afirma katak iha tempu ne’ebé nakonu ho terus no sofrimentu, Timor-Leste hamriik iha solidariedade fraterna ho povu Indonézia. Liuliu ba komunidade sira iha área Flores ne’ebé afetadu maka’as liu no hasoru hela konsekuénsia husi katástrofe ida-ne’e.
“Timor-Leste hamriik iha solidariedade fraterna ho povu Indonézia, liuliu komunidade sira iha área Flores ne’ebé afetadu maka’as liu, ne’ebé hasoru hela konsekuénsia husi katástrofe ida-ne’e no dezafiu imensu ne’ebé rezulta husi destruisaun infraestrutura no interupsaun ba asesu ba servisu esensiál sira,” nia afirma.
Prezidente Ramos-Horta hato’o mós agradesimentu ba ekipa buska no salvamentu, profisionál saúde, forsa seguransa no voluntáriu sira ne’ebé kontinua serbisu ho aten-barani iha kondisaun sira ne’ebé susar tebes hodi tulun populasaun sira ne’ebé afetadu.
Nia konklui ninia mensajen ho deseju sinseru ba rekuperasaun lalais ba sira ne’ebé kanek no esperansa katak esforsu tulun no rekonstrusaun sei hamenus lalais sofrimentu husi komunidade sira ne’ebé afetadu.
Jornalista : Hortêncio Sanchez
Editór : Cancio Ximenes
