Autoridade Kovalima kria formatu monitorizasaun implementasaun PME
KOVALIMA, 19 Agostu 2026 (TATOLI) – Autoridade Munisípiu Kovalima, liuhusi Sekretáriu Munisípiu Asuntu Sosiál no Organizasaun Komunitária, Filomeno Cardoso, lidera enkontru atu kria formatu monitorizasaun ba implementasaun Programa Merenda Eskolár (PME) iha Munisípiu Kovalima.
“Ami realiza enkontru ida-ne’e atu prenxe formatu no kria ekipa hodi halo monitorizasaun ba implementasaun Programa Merenda Eskolár (PME) iha Munisípiu Kovalima,” Sekretáriu Munisípiu Asuntu Sosiál no Organizasaun Komunitária, Filomeno Cardoso, dehan ba jornalista sira iha Salaun AMC, Kovalima.
Autoridade Kovalima hateten katak, molok halo monitorizasaun, ekipa sira presiza hamutuk atu kria formatu ho pájina hitu ne’ebé sei uza hodi monitoriza implementasaun PME iha eskola sira ne’ebé eziste iha munisípiu.
“Formatu ne’ebé ita elabora depende ba pergunta sira ne’ebé foka ba lala’ok no menu alimentasaun. Presiza kria PME tanba durante implementasaun ita hasoru dezafiu barak. Tanba ne’e, ita kria ekipa no tuur hamutuk hodi halo monitorizasaun, identifika problema no obstákulu sira,” nia dehan.
Nia hateten katak ekipa ne’ebé sei halo monitorizasaun ba implementasaun PME kompostu husi Servisu Munisípiu Edukasaun Kovalima, Saúde, Seguransa Alimentár no Finansas.
Ekipa ne’e lidera husi Sekretáriu Munisípiu Asuntu Sosiál no Organizasaun Komunitária, ho objetivu atu monitoriza implementasaun PME iha eskola 132 iha Munisípiu Kovalima.
Iha sorin seluk, Pontu Vokál PME Edukasaun Kovalima, Hernani Pereira da Silva Vicente, hateten katak reuniaun ne’e importante atu forma ekipa ne’ebé sei halo monitorizasaun ba implementasaun PME.
“Ami forma ekipa atu halo monitorizasaun ba implementasaun PME iha eskola sira. Governu fó apoiu orsamentu boot ba prosesu implementasaun, nune’e ita presiza halo avaliasaun atu hatene progresu, problema no dezafiu sira, no rona diretamente husi terrenu,” nia dehan.
Prosesu implementasaun PME antes ne’e involve ekipa husi Edukasaun, inspetór eskolar no Administrasaun Munisípiu, inklui Servisu Munisípiu Seguransa Alimentár no Saúde, atu halo monitorizasaun.
Maibé, ekipa sira kontinua forma mekanizmu monitorizasaun atu identifika problema, dezafiu no progresu iha implementasaun, nune’e bele buka solusaun ba problema sira ne’ebé mosu.
Durante monitorizasaun PME, ekipa identifika problema balun, inklui implementasaun menu alimentasaun ne’ebé la tuir planu. Menu alimentasaun PME fahe ba grupu ai-han ne’ebé fó forsa, haburas no proteje saúde labarik sira.
Orsamentu Jerál Estadu (OJE) 2025 ba implementasaun Programa Merenda Eskolár (PME) iha Munisípiu Kovalima hamutuk US$1,165,367.68. Husi orsamentu ne’e, US$110,520 aloka ba eskola pré-eskolár no US$1,278,029 ba eskola ensinu báziku.
Implementasaun PME 2025 planeadu atu hala’o durante loron efetivu 148, ne’ebé sei implementa husi Ekipa Jestaun Programa (EJP) hamutuk 23. Kada estudante iha direitu atu hetan merenda ho valor US$0.35.
Atu hanoin fila-fali, implementasaun PME 2024 hahú ho lansamentu iha Eskola Bázika Sentral (EBC) Suai Loro, iha loron 13 Maiu. Enkuantu implementasaun PME 2025 hahú ho lansamentu iha Eskola Bázika Sentral (EBC) Lontale, iha loron 10 Marsu.
Jornalista: Celestina Teles
Editór: Florencio Miranda Ximenes
