F-KHK fasilita kona-ba prosesa pellet ba grupu 11 iha Vikeke
VIKEKE, 19 Agostu 2026 (TATOLI)—Organizasaun Naun Governamentál (ONG) Lokál Fundasaun Knua Haberan Komunidade (F-KHK) iha Munisípiu Vikeke fasilita kona-ba prosesamentu pellet hahán balada nian ba grupu agrikultura 11 iha Postu Vikeke Vila.
Diretór ezekutivu F-KHK, Augusto Pinto, haktuir kona-ba formasaun prosesamentu hahán ba balada nian ne’e sai importante ba komunidade ne’ebé haki’ak manu no fahi sira.
“Formasaun ba prosementu ne’e ami hetan fundu husi Gabinete Apoiu Sosiedade Sivíl ba tinan ida-ne’e hamutuk rihun $25. Formasaun ne’e oferese husi funsionáriu F-KHK oinsá prodús hahán ba fahi no manu nian. Iha formasaun ne’e pratika matéria prima ne’ebé prosesa ba hahán balada nian ne’ebé utiliza hare-uut, hudi-kain, batar, ikan-maran no produtu seluk,” Augusto Pinto dehan ba TATOLI, iha Postu Vikeke Vila, Kuarta ne’e.
Diretór Ezekutivu F-KHK reforsa liuhusi formasaun prosesamentu hahán ba balada ne’e bele ajuda grupu sira, atu sira bele prodús rasik hodi fó han ba balada sira no hadi’a ekonomia família uma laran nian.
“Tanba ita-nia komunidade balun depende ba balada mak sustenta ba sira-nia uma laran, entaun liuhusi formasaun ne’e ita bele ajuda sira oinsá prodús rasik hahán ba manu, fahi no ikan sira,” nia realsa.
Augusto informa maski grupu sira hetan ona formasaun ba prosesamentu balada nia hahán, maibé difikuldade ne’ebé grupu sira enfrenta mak seidauk iha ekipamentu hanesan mákina prodús pellet.
Iha fatin hanesan, Responsavel ba Formasaun husi F-KHK, Marito da Silva, hateten grupu hamutuk 11 mak partisipa no kada grupu ida ema na’in-lima (5) ho ema hamutuk na’in-55 mak partisipa formasaun.
Formasaun ne’e durante loron-haat (4), iha Suku Uma-Ki’ik, Postu Administrativu Vikeke Vila, durante loron haat hetan partisipa husi grupu hamutuk 11 ho totál ema hamutuk na’in-55.
Jornalista: Vitorino Lopes da Costa
Editór: Xisto Freitas da Piedade
