Florestrál Baukau husu komunidade labele sunu duut
BAUKAU, 19 Agostu 2026 (TATOLI)—Serbisu Delegasaun Territoriál Florestrál, Plantasaun Industriál (SDTFPI) Baukau husu komunidade kontribui proteje ai-horis liuhusi asaun labele sunu duut.
Koordenadór SDTFPI Munisipá Baukau, Pascoal Afonso Belo, esplika asaun labele sunu duut nu’udár parte importante salva ai-horis tanba funsionamentu ai konserva bee no prevenei dezastre naturál.
“Sunu arbiru estraga buat barak la’ós estraga de’it duut sira, maibé bele estraga mós ai-oan. Kuandu ai-oan sira ahi han ona, futuru ita-nia oan sira uza laiha ona,” Pascoal Belo hateten iha ninia kna’ar fatin, Vila Nova, Baukau, Kuarta ne’e.
Pascoal Belo relata parte Delegasaun Florestal Baukau destaka ona guarda Florestál iha postu administrativu sira ho obejetivu fahe informasaun no sensibiliza komunidade kona-ba asaun prevensaun sunu duut arbiru no destroisaun floresta bazeia ba Lei Númeru: 17/2000 kona-ba bandu estraga floresta, Lei Numéru: 06/2020 kona-ba sistema nasionál área protejida no Dekretu Lei Númeru: 06/2020 kona-ba biodiversidade.
Aleinde ne’e, asaun sunu duut konsideradu nu’udár meiu tradisionál husi agrikultór sira bainhira halo preparasaun toos molok udan maibé la signifika tenke sunu arbiru hodi afeta ba ai-horis ne’ebé protejida.
“Se sunu arbiru, ami tenke kaptura bazeia ba lei ne’ebé eziste no dispozisaun kona-ba biodiversidade, no iha Kódigu Penál ne’ebé bele uza hodi prosesu sira iha Ministériu Públiku,” Pascoal Belo informa.
SDTFPI Baukau mós husu ba autoridade lokál hanesan xefe suku atu apoia serbisu Guarda Florestrál iha terrenu no fahe informasaun bainhira deteta sidadaun sira sunu duut iha tempu bailoron.
Jornalista: Natalino Belo
Editór: Xisto Freitas da Piedade
