Forénsiku HNGV finaliza ona autopsia no entrega matebian Silvino Gomes ba família

DILI, 19 Agostu 2026 (TATOLI)—Departamentu Forénsiku iha Hospital Nasional Guido Valadares (HNGV) finaliza ona halo autopsia ba matebian Silvino Gomes ne’ebé hetan tiru husi oknum Polísia Nasonál Timor-Leste (PNTL) husi Seksaun Tránzitu iha Postu Administrativu Uatukarbau, Munisípiu Vikeke ne’e, entrega ona ba família.

“Ita finaliza ona autopsia no ami forénsiku entrega ona ba família atu haloot tuir idaidak nia kultura,” Xefe Departamentu Forénsiku HNGV, Nilton da Silva, hateten ba jornalista sira, ohin.

Nia dehan, antes husi autopsia hein mandadu tribunál husi Ministériu Públiku Munispiu Baukau, hafoin mandadu ne’e to’o ekipa hahú halo autopsia iha oras tuku 15h00 to’o 16h00 lorokraik mak finaliza no entrega kedas ba familia.

“Ami autopsia hotu iha lorokraik, entaun ami entrega ba família depois família lori mate-isin ba kapela HNGV halo misa funébre,  depois lori fali mai mortuáriu no ohin dadeer madrugada tuku 05h00 ne’e mak tula sai ba nia moris fatin Uatukarbau,” nia dehan.

Nia esplika, kona-ba relatóriu atu submete ba Tribunál Baukau ne’e sei hein loron lima tan, tanba sei rekolla dadus sira.

“Relatoriu sei prontu maizumenus loron lima tan mak ami submete ba Tribunal Baukau,” nia afirma.

Antes ne’e, Silvino Gomes, ne’ebé suspeitadu hetan tiru husi oknum Polísia Nasonál Timor-Leste (PNTL) husi Seksaun Tránzitu iha Postu Administrativu Uatukarbau, Munisípiu Vikeke, hakotu ona iis iha Ospitál Nasionál Guido Valadres (HNGV), iha Domingu (16/08) maiizumenus tuku 09h00 dadeer, hafoin doutór sira halo operasaun hodi hasai bala husi nia isin, nune’e família entrega ba prosesu judisiál.

“Kona-ba kronolojia, ha’u ladún hatene tanba ha’u hela iha Vikekeke, ha’u-nia subriñu ne’e hela iha Uatukarbau. Ha’u ladún hatene didi’ak kona-ba kronolojia ne’e nia lala’ok depoizde 09h15 sira telefone ha’u dehan Polísia tiru. Maibé tanba saida mak tiru ne’e ha’u lahatene tanba ita laiha oin, ita labele naran ko’alia, ne’e maka ha’u la naran ko’alia. Komu nia mate ona, klaru, ami família nia hakarak prosesu ne’e tenke tuir lei. Karik matebian mak atu sala mós laiha buat ida, mas prosedur ne’e Tribunál mak tenke deside. Mas Ami família nia hakarak ne’e mak buat hotu tenke tuir prosesu ba,” Reprezentante husi vítima, Elizário da Silva hato’o ba jornalista sira iha resintu HNGV, Segunda (17/08) ne’e.

Nia dehan, família autoriza ona Polísia atu halo autopsia ba mate-isin. Vítima momentu ho motór no la tau kapasete mak Polísia tiru.

“Ida-ne’e depende ona investigasaun mak bele justifika. Ha’u horikalan mós ko’alia ho nia maun hodi ko’alia ho nia selagi nia iis sei iha, nia mós ko’alia nune’e, ha’u la tau kapasete loos. Maibé horsida to’o iha Tribunál ne’ebá mak ita-boot sira rona,” nia akresenta.

Elizário da Silva hatutan, tanba Polísia mai ona ko’alia ho nia atu autoriza autópsia mate ne’e no nia autoriza autópsia para bele hetan evidénsia ruma atu halo prosesu la’o ba oin. Maibé husi parte família ezije mak tenke tau lei ne’e tuir nia koridór, sala ne’e tenke sala, lia loos ne’e tenke loos.

Nia dehan, oknum ne’ebé tiru buat ketak ida, enkuantu institisaun ne’e buat ketak ida, ne’ebé buat hotu tenke tau ketak.

“Ami ezije onkum ne’e hakarak ka lakohi nia tenke prosesu bazeia ba lei ne’ebé mak iha, karik lei dehan katak ida tiru ne’e mate ona, ida tiru ne’e la kastigu, ne’e ita labele halo buat ida. Nee lei mak haruka. Se lei dehan kondena ne’e klaru ita tenke prosesu,” nia dehan.

Ba família, Tribunál mak deside sé loos mak sala no loos

Elizario da Silva konta tuir, matebian Sivino Gomes momentu Polisia tiru ne’e la mate iha fatin, momentu ne’ebá lori kedan mai ospitál Vikeke no transporta kedan ho aviaun husi vikeke bá Dili hodi lori bá HNGV iha tuku 13h00 to’o 04h00 no tuku 20:00 halo operasaun ba vítima.

“Situaun mak hanesan doutor halo nia serbisu másimu tebes maibé nia realidade mak hanesan ne’e,  ita labele tau kulpa ba fali doutór,” nia dehan.

Vítima nia kondisaun grave tanba bala ne’e borus husi kotuk mai iha oin.

“Depende ha’u rona, husi doutór ne’ebé mak halo operasaun, nia dehan ba ha’u bala kona nia tee boot no kiik, tee boot nee kuak parte tolu no tee kiik ne’e kanek haat. Kuandu doutór sira opera hotu bolu ha’u, koalia ba ha’u katak ita-nia subriñu ne’e nia teen ida kiik ne’e kuak haat. Doutór ida opera sira maka ko’alia no sira tesi no junta ona mas grave, ne’ebé ita husu boot ba Maromak de’it, milagre Maromak ne’e buat ketak ida, mas ida mak nia rezultadu mak ne’e, maibé ami família hakarak buat hotu tuir prosesu de’it,” nia hateten.

Família deside ona atu halo autópsia ba mate-isin matebian nian depende ba mandadu husi Ministériu Públiku nian tanba atu prosesa kazu ne’e iha Tribunál presiza evidésia.

“Mate-isin ami asegura ona iha ne’ebá, ne’ebé hein mandadu husu Prokuradór tun mai bainhira mak autópsia aban ka bain rua mak autópsia ita hein deit. Nia husik hela oan ida,” Remprezentante família haktuir.

Tuir vítima nia tiun, Silvino Gomes durante ne’e laiha problema ho ema ruma, nein ho Polísia ne’ebé tiru nia.

Biban ne’e, Elizário da Silva rekomenda ba Governu atu kontinua aposta ba formasaun membru PNTL sira.

Jornalista : Felicidade Ximenes

Editór        : Cancio Ximenes