HNGV rekoñese estasionamentu iha opsitál limitadu
DILI, 19 Agostu 2026 (TATOLI)—Diretór Servisu Apoiu Diagnóstiku no Terapéutiku iha HNGV, Vidal de Jesus Lopes, HNGV rekonese katak estasionamentu iha ospitál nasionál limitadu tebes tanba famila pasiente mai barak, tanba kada loron númeru pasiente no númeru vizitante aumenta ba beibeik.
“Estasionamentu mak limitadu ne’e ami rekoñese, uluk ami uza seguransa regula vizitante familia ho funsionáriu iha HNGV rasik, estasionamentu A boot iha sorin ne’ebá ba vizitante sira ne’ebé mai ho motor no karreta, ida office oin ne’e ba funsionáriu sira, ida emerjénsia oin ne’e ba VIP sira bainhira mai vizita” dehan Vidal de Jesus Lopes ba jornalista sira iha HNGV, ohin.
Nia informa, agora ospitál halo ona rekrutamentu seguransa pesoál na’in-10 iha fulan rua ba kotuk, tanba sira mak pesoál kontrolu estasionamentu, bainhira karreta ho motór tama sira mak regulariza.
“Mais to’o agora ami seidauk implementa ba vizintante sira mai ho karreta no motór haruka atu selu ne’e seidauk, tanba presiza haree didi’ak regulamentu balun antes implementa. Tanba ida-ne’e la fasil haruka vizitante sira selu. Se bainhira laiha baze legál maibé parte ospitá esforsu hela atu dezenvolve planu ne’e ba oin atu implementa bainhira vizitante mai ho karreta motór sira selu, agora daudaun sei livre hela ospitál só haruka regulariza de’it,” nia dehan.
Nia relata, antes ne’e HNGV orienta ona seguransa atu kontrola estaisonamentu iha HNGV hodi kontrola vizitante no família ne’ebe ba vizita moras iha HNGV.
“Medida ida-ne’e mós hanesan parte husi esforsu HNGV atu hadi’a sistema jestaun tráfiku internu no fó asesu lalais ba servisu emerjénsia, liuliu iha tempu ne’ebé movimentu ema no veíkulu aas. Servisu Kontrolu Parajen HNGV maka kna’ar ida ne’ebé tutela iha Diresaun Administrasaun, ne’ebé hala’o servisu kontrola ba parajen transporte publiku, atu nune’e bele orienta veíkulu bainhira tama no sai husi área estasionamentu HNGV,” nia hateten.
Tanba Pesoal Servisu Kontrolu Parajen se hahú sira nia servisu husi dadersan oras 08h00 to’o Lokraik oras 17h00. Aleinde ne’e tuir regulamento parajen iha HNGV, área estasionamentu ba veikulu visitante no funsionáriu HNGV fahe ba zona haat mak hanesan area A autoriza karreta no motorizada públiku ka vizitante, área B, C, D autoriza deit ba funsionariu HNGV.
“Area edifisiu administrasaun nia oin autoriza ba karreta Konsellu Directiva HNGV no parajen iha banku emerjénsia nia oin autroriza de’it ba karreta Membru Governu, bainaka VIP/VVIP, bainhira vizita mai HNGV inklui ambulansia tula pasiente mai emerjensia,”Nia Konklui.
Jornalista : Felicidade Ximenes
Editór : Cancio Ximenes
