HNGV rekonese estoke ai-moruk menus
DILI, 19 Agostu 2026 (TATOLI)—Diretór Servisu Apoiu Diagnóstiku no Terapeutiku iha HNGV, Vidal de Jesus Lopes, rekoñese estoke ai-moruk balun menus maibé atu distribui ne’e INFPM nia kompeténsia.
“Estoke ai-moruk to’o agora seidauk atualiza mai maibé provisoriamente estoke ida ka rua estoke mamuk maibé ida-ne’e normál, ida-ne’e hanesan kompara karik nesesiade uma laran estoke balun laiha no estoke balun atu mai depende ba esforsu INFPM nian. Tanba HNGV hanesan user de’it, atu prosesa kompra armazena no distribui ne’e INFPM nia kompeténsia,” Vidal Lopes dehan ba jornalista sira iha HNGV, ohin.
Dirijente ne’e esplika, antes ne’e iha item balun liu-liu ai-moruk konsumaveis ne’ebé mak stock out ne’e daudaun ne’e hetan ona distribuisaun husi INFPM.
“Item sira hanesan soltura , bainhira pasiente ida halo operasaun presiza suku, luvas no konsumaveis báziku ne’ebé fasil lalais ne’e, loron-loron uza maka’as ne’e INFPM fornese ona balun mai iha ne’e,” nia dehan.
Antes ne’e, Pasiente Esmeralda da Silva hateten, nia parte mai atu foti ai-moruk oin rua hanesan vítamina no mós ai-moruk ba moras raan midar nian, maibé ai-moru raan-midar nian ne’e stock out, entaun sira dehan semana oin mak mai fali.
“Sira haruka ha’u ba sosá maibé ha’u-nia osan laiha, maibé agora ha’u-nia rezerva iha musan ida no rua iha hela, la presiza hotu kedas mak mai foti ka lae. Dalaruma ha’u sosá, ai-moruk ne’e tablet ida $3 no depois musan neen de’it. Ha’u baibain sosa iha apotik ida iha Kampu Alor, reseita ne’e sira mak fó ba ha’u hodi ba sosá,” Pasiente Esmeralda da Silva hateten ba jornalista sira iha resintu HNGV.
Nia dehan Hospitál Nasionál Guido Valadares foin primeiravés sira rezeita ba nian atu ba sosa ai-moruk iha apotik sira.
“Ha’u foin primeiravés ai-moruk laiha, sira dehan, se semana oin mai check fali para foti, osan iha reseita ne’e iha sira fó ai-moruk oin rua, vítamina simu tiha maibé raan-midar nian mak laiha, ne’e mak dehan semana oin mai check,” nia dehan.
Tanba ne’e, nia rekomenda ba Ministériu Saúde no Hospoitál Nasionál Guido Valadares tau atensaun ba stock out ai-moruk iha ospitál nune’e bele fó ba pasiente sira.
Jornalista : Felicidade Ximenes
Editór : Cancio Ximenes
