Konstrusaun Ponte Uelolo Vikeke Vila iha ona progresu
VIKEKE, 19 Agostu 2026 (TATOLI)—Koordenadór Infraestrutura Destakadu Ministériu Obra Públika (MOP) iha Munisípiu Vikeke, Mário Ângelo Menezes, informa konstrusaun fízika ba obra Ponte Uelolo lokaliza iha Aldeia Uma-Boot, Suku Luka, Postu Administrativu Vikeke Vila, Munisípiu Vikeke, daudaun ne’e iha ona progresu di’ak.
“Progresu fíziku konstrusaun Ponte Uelolo daudaun ne’e atinje 15,05%. Empreza implementadór sei kontinua servisu konstroe obra ne’e,” Mário Ângelo dehan ba TATOLI iha Postu Vikeke Vila, Kuarta ne’e.
Mário relata bazeia ba progresu fíziku 15.05% empreza konstrui ona ai-riin ponte inklui rampa ponte nian no daudaun ne’e empreza kontinua halo instalasaun bondex, halo metin baut ba ponte nian, hafoin kontinua cor simente ba Ponte Uelolo.
“Ponte Uelolo, ami kontinua superviziona ba servisu sira. Prosesu servisu kle’ur mak kontrusaun morru protesaun sira tanba ne’e mak progresu fíziku ba Ponte Uelolo sei ki’ik,” nia tenik.
Mário hatutan dezafiu ne’ebé empreza enfrenta mak bee iha mota laran sempre difikulta empreza halo sira-nia servisu tanba servisu iha mota laran bainhira halo servisu tenke hasa’e bee foin bele servisu konstrusaun.
“Nune’e kada loron empreza tenke bomba bee sai mak foin servisu ba morru protesaun sira-ne’e, empreza tenke hadau malu ho bee. Ida-ne’e mak sai dezafiu ba empreza, maibé empreza kontinua halo sira-nia servisu nunka para,” nia relata.
Nia afirma, ekipa téknika Unidade Inspesaun, Verifikasaun no Pagamentu husi Ministériu Obra Públika (UIVP-MOP) sei kontinua halo monitorizasaun ba prosesu reabilitasaun Ponte Uelolo ne’ebé ezekuta husi empreza Nananiu Unipessoal, Ldas.
“Ha’u hanoin ba kontrusaun Ponte Uelolo ne’e tama Fulan-Outubru ka Fulan-Novembru 2026 ne’e posibilidade finaliza,” nia hato’o.
Kustu ba konstrusaun totál hamutuk $4.398.863,24, ho durasaun loron 365. Lansamentu hahú iha 04 Outubru 2025. Lansa diretamente husi Xefe Governu, Kay Rala Xanana Gusmão, ne’ebé akompaña husi Ministru Obra Públika, konstrusaun obra sei benefísia ba família hamutuk na’in-2.455.
Jornalista: Vitorino Lopes da Costa
Editór: Xisto Freitas da Piedade
