Projetu irrigasaun Sordoli sei reativa área agríkola ektare 700
BOBONARU, 19 Agostu 2026 (TATOLI)- Autoridade Munisípiu Bobonaru (AMB) implementa projetu konstrusaun irrigasaun Sordoli, uku Lourba, postu administrativu Bobonaru, ne’ebé sei fornese bee ba área agríkola ho luan kuaze ektare 700, ne’ebé inklui iha suku Lourba, Malilait no Soilesu.
Obra ne’e fizikamente foin implementa iha semana kotuk no daudaun ne’e to’o ona faze halo kanál irrigasaun.
Xefe Suku Lourba, Lino da Cruz, konfirma katak komunidade sente kontente tanba irrigasaun ne’e bele fó oportunidade ba sira atu reativa terrenu mamuk ne’ebé durante tinan barak abandona. “Ho irrigasaun ne’e, komunidade bele halo atividade agríkola hanesan kuda modo no, tempu udan, uza rai ba natar”, Lino da Cruz dehan ba jornalista sira, kuarta-feira ne’e.
Nia hateten katak, área ne’ebé potensiál ba atividade agríkola kuaze ektare 700, husi ponte Babalai to’o Sordoli. Antes ne’e, komunidade halo natar depende de’it ba udan-been, tanba bee irrigasaun ne’ebé antes ne’e empreza Riski kontrui la funsiona ho di’ak no la kobre hotu área produtiva.
“Nune’e rai barak abandona no sai maran. Maibé ho irrigasaun ida-ne’e, aban-bainrua sira bele funsiona hotu, halo natar, kuda modo, halo to’os no atividade seluk tan”, nia hatete.
Líder komunitáriu ne’e argumenta katak irrigasaun ne’e bele fasilita no motiva liután agrikultór sira atu hasa’e produsaun agríkola hodi responde ba konsumu doméstiku no ba merkadu.
Biban ne’e, eis-membru Polísia Nasionál Timor-leste ne’e mós husu atu projetu irrigasaun ne’e bele kontinua aumenta, tanba distánsía metru 530 de’it distribuisaun bee la kobre to’o área balun.
“Rai iha foho leten ne’e sei mamuk, ha’u preukupa uitoan tanba rai hirak ne’e sira kesi de’it animál, sira halo lutu tiha hanesan ne’e abandona hela, tanba bee la ba to’o ne’ebá”, nia dehan.
Natar-na’in iha Sordoli, Noel Soares, hatete sistema irrigasaun foun ne’e bele fó asesu di’ak ba bee no permite sira filafali halo atividade agríkola. “Uluk irrigasaun tuan empreza halo, ami uza tinan ida de’it, depois rai taka metin. Durante bee la mai ne’e rai barak abandona, sai maran hotu, tanba ami la halo natar no modo. Agora ami kontente, se bee ne’e nia prosesu la’o normál, to’os-na’in sira sei halo atividade agríkola hanesan baibain”, Noel Soares dehan.
Notísia relevante: Rai-halai iha Sordoli provoka mudansa iha dezeñu projetu irrigasaun
Obra ne’e ezekuta husi empreza lokál Biasale Unipessoal Lda. ho totál orasamentu $400.500 husi fundu Planu Dezenvolvimentu Integradu Munisipál (PDIM) tinan 2026.
Notísia relevante: PDIM 2026 iha Bobonaru: Empreza liu 70 kompete konkursu públiku ba projetu 22
Jornalista: Sergio da Cruz
Editora: Maria Auxiliadora
