TL-Portugál kontinua hametin kooperasaun bilaterál iha área oioin
DILI, 19 Agostu 2026 (TATOLI)—Ministru Negósiu Estranjeiru Portugál, Paulo Rangel, hala’o enkontru ho Primeiru-Ministru, Kay Rala Xanana Gusmão, hodi kontinua hametin relasaun bilaterál ne’ebé durante ne’e nasaun rua hala’o hela.
Primeiru-Ministru, Kay Rala Xanana Gusmão, hateten prezensa Ministru Negósiu Estranjeiru Portugál nian iha Timor-Leste nu’udar vizita ofisiál ba daruak nian.
“Agora nia mai hodi partisipa iha reuniaun konsellu ministru CPLP, nune’e ohin ami hasoru malu ko’alia uitoan kona-ba asuntu CPLP no kooperasaun bilaterál entre Portugál ho Timor-Leste,” Primeiru-Ministru, Kay Rala Xanana Gusmão, informa ba jornalista sira iha Palásiu Governu, ohin.
Ministru Negósiu Estranjeiru Portugál, Paulo Rangel, hakarak hato’o agradeseimentu ba Primeiru-Ministru Kay Rala Xanana Gusmão tanba fó oportunidade ba sira hodi hala’o sorumutu ida-ne’e, liuliu iha loron importante ida ba reuniaun konsellu ministru CPLP ba da-30.
Normalmente iha enkontru ohin sira ko’alia kona-ba asuntu CPLP nian no mós kona-ba asuntu bilaterál, liuliu kooperasaun iha área lian portugés no progresu ne’ebé iha Eskola Portugeza foun.
“Konkursu ba projetu ne’e sei lansa iha tempu badak mai, misaun téknika ida mós iha ona Timor-Leste liu semana ida. Tanba ne’e, ha’u haree katak ida-ne’e notísia di’ak tebes ba dezenvolvimentu lian portugés no ba estudante sira iha eskola portugeza,” Ministru Negósiu Estranjeiru Portugál relata.
Aleinde ne’e, Ministru ne’e dehan sira mós ko’alia kona-ba Timor-Leste tama ba ASEAN no oinsá oportunidade ne’e sai estratéjika, la’ós de’it ba Timor-Leste maibé mós ba CPLP tomak.
“Iha biban ne’e ha’u mós hakarak hato’o kongratula ba organizasaun Reuniaun Ministeriál ne’e, ne’ebé ha’u konsidera perfeitu, ho rezultadu sira-ne’ebé interesante tebes no bele haree iha komunikadu finál, preparasaun hotu-hotu ne’e Timor-Leste halo ho di’ak tebes,” nia dehan.
Ba daruak nian Ministru ne’e hakarak hato’o agradese ho laran tomak ba povu Português tomak tanba apoiu boot ne’ebé Timor-Leste fó ba kandidatura Portugál atu sai membru permanente la’ós iha Konsellu Seguransa Nasoin Unida.
“Timor-Leste nia apoiu importante tebes iha nasaun barak iha rejiaun ne’e no Timor-Leste ajuda tebes atu promove mensajen Portugál nian. Tanba ne’e, ha’u hakarak hato’o rekoñesimentu ida ba autoridade Timor-Leste hotu-hotu ne’ebé iha oportunidade barak fó apoiu ba ami,” governante ne’e afirma.
Jornalista : Alexandra da Costa
Editór : Cancio Ximenes
