Uma-Kain 170 iha Beto-Tasi simu ona indemnizasaun ba projetu alargamentu AIPNL
DILI, 19 Agostu 2026 (TATOLI) – Xefe Suku Madohi, Bernandino Cristo Ferreira, informa katak Governu liuhusi Administrasaun Aviasaun Sivíl no Navegasaun Aérea (ANATL, E.P.) fó ona indemnizasaun ba uma-kain 170 iha Aldeia Beto Tasi, Suku Madohi, Postu Administrativu Dom Aleixo, Munisípiu Dili, ne’ebé afetadu hosi despezu administrativu ba alargamentu Aeroportu Internasionál Prezidente Nicolau Lobato (AIPNL), Díli,
Enkuantu, nia hateten hela de’it uma-kain hamutuk 35 mak seidauk hetan indemnizasaun.
Bernandino esplika katak prosesu indemnizasaun ba uma-kain 170 bele lao lalais tanba sira kolabora di’ak ho autoridade lokál no ANATL, E.P., durante levantamentu dadus iha fulan Marsu 2026, molok despezu administrativu hahú iha Abril.
Hafoin prosesu levantamentu no verifikasaun dadus, uma kain 170 ne’e simu ona sira nia indemnizasaun.
Enkuantu, uma kain 35 seidauk hetan indemnizasaun tanba, tuir Xefe Suku Madohi, sira seidauk kolabora ho autoridade lokál hodi kompleta dokumentasaun ne’ebé presiza.
Nia hateten katak uma kain sira ne’e konsidera rai ne’ebé sira hela ba iha Aldeia Beto Tasi hanesan rai privadu, enkuantu Governu konsidera rai ne’e hanesan rai Estadu.
“Governu liuhusi ANATL prontu atu fó indemnizasaun ba hela-fatin no ai-horis, maibé sira lakohi kolabora tanba sira konsidera rai ne’ebé sira hela ba iha Aldeia Beto Tasi hanesan rai privadu no la’ós rai Estadu. Se hakarak hetan indemnizasaun ba hela-fatin, no ai-horis tenke konsidera nu’udar kompensasaun ida de’it,” Bernandino dehan.
Nia mós hateten katak, antes ne’e, uma kain 35 ne’e disputa kona-ba propriedade rai iha Beto Tasi ho Governu, maibé lakohi ba tribunal.
Tuir desizaun tribunal, rai ne’ebé sira hela ba iha Beto Tasi pertense ba Estadu, nune’e Governu iha direitu atu fó indemnizasaun ba hela-fatin no ai-horis, la’ós ba rai.
“Uma kain 35 ne’e lakon ona direitu atu hetan indemnizasaun ba rai. Maibé, to’o agora, autoridade lokál sei esforsu nafatin hodi halo diálogu ho ANATL, E.P., atu buka dalan ne’ebé bele ajuda sira hetan indemnizasaun, atu bele uza ba sira nia nesesidade loroloron,” nia dehan.
Bernandino hateten katak autoridade lokál sei kontinua koordena ho ANATL, E.P., atu buka solusaun ba situasaun uma kain 35 ne’e, maski prosesu indemnizasaun sei depende ba dokumentasaun no regra ne’ebé vigora.
Despezu administrativu ne’e halo parte hosi planu Governu atu fó espasu ba alargamentu no dezenvolvimentu Aeroportu Internasionál Prezidente Nicolau Lobato.
Jornalista: Camilio de Sousa
Editór: Filomeno Martins
