Xefe Estadu husu Timor-Leste prepara-an antes hasoru dezastre naturál
DILI, 19 Agostu 2026 (TATOLI)—Prezidente Repúblika, José Ramos-Horta, husu ba Governu no povu Timor-Leste atu prepara-an didi’ak ho rekursu umanu no ekipamentu barak liu hodi hasoru dezastre naturál.
“Rai nakadoko iha NTT ne’e ha’u haruka ona karta ba Prezidente Prabowo hodi hato’o kondolénsia. Tanba dezastre naturál ne’e akontese iha rai barak. Kolómbia mós hetan inundasaun. Buat hotu-hotu impaktu ba rai ki’ik, rai boot hanesan Xina no seluk tan,” Xefe Estadu hateren ba jornalista sira hafoin partisipa semináriu internasionál kona-ba “Intelijénsia Artifisiál no Kreatividade” iha Kampus Dili Institutu of Technology (DIT), ohin.
Tuir nia, nasaun hanesan Indonézia no Filipina ema reziliente tebes. Maske sempre hasoru dezastre maibé sira bele monu no hamriik fali.
“Indonézia ne’e sempre maibé sira ema reziliente loos, sira bele monu hamriik, hanesan Filipina sira. Sobu sira hadi’a. Maibé kadavés buat ne’e akontese, klaru hotu-hotu nu’udar ema no viziñu triste tebes,” nia hateten.
Prezidente Repúblika fó ezemplu dezastre ne’ebé akontese iha Timor-Leste hanesan inundasaun iha tinan 2021 no 2022 ne’ebé halo ema lubuk ida terus no sasán barak estragus.
Nia mós haktuir kona-ba mudansa klimátika ne’ebé halo loron manas boot no inséndiu barak iha Europa ne’ebé rezulta ema barak mate. Tanba ne’e, nia husu Timor-Leste tenke preparadu ba dezastre naturál.
“Ne’e mós bele akontese ho ita. Timor-Leste tenke preparadu ba dezastre naturál. Ha’u haree servisu di’ak tebes maibé meiu ladun. Koordenasaun tenke di’ak liu,” nia afirma.
Xefe Estadu rekomenda katak Governu presiza investe barak liu iha rekursu umanu, infraestrutura no ekipamentu.
Nia dehan mós prevensaun ho teknolojia importante atu bele deteta dezastre semana ka loron ruma antes akontese.
“Rekursu umanu barak liu, infraestrutura ekipamentu barak liu. Depois tenke iha prevensaun teknolojia ne’e importante bele hatene loron ka semana ruma dezastre naturál akontese,” nia esplika.
Maske nune’e, nia rekoñese katak iha dezastre balun hanesan rai-nakdoko iha Flores ne’e difisil atu prevene.
Jornalista : Hortêncio Sanchez
Editór : Cancio Ximenes
