Aero Dili deteta voo Dili-Xina pasajeiru barak liu husi Xineza
DILI, 20 Agostu 2026 (TATOLI)—Diretór Empreza Aero Dili, Lourenço Oliveira, hateten durante ne’e Aero Dili nia voo ba Xina to’o agora estavel hela tanba pasajeiru barak liu ne’e husi xineza no Denpasar Bali mós hanesan, kadeira la mamuk kuaze 40% to’o 60%.
“Voo ba Xina ne’e pasajeiru timoroan na’in ida ka rua de’it, restante ne’e mesak xineza de’it tanba xineza sira-ne’ebé loke investimentu iha ita-nia rai kuazé 23.000, entaun ita-nia merkadu mak sira,” Diretór Aero Dili relata ba Agência Tatoli liuhusi telefónika, ohin.
Emprezáriu ne’e hatutan katak Aero Dili nia ezisténsia iha aviasaun nian foin mak tinan tolu, entaun presiza la’o neineik sela’e bele monu (bangkrut) kompara ho nasaun seluk ne’ebé eziste tinan 50 ona iha aviasaun nian.
“Satán foin dadauk folin mina sa’e iha médiu oriente impaktu tebes ba ita-nia investimentu no ami konsege hapara tiha voo balun hanesan Dili-Oekusi tanba folin mina sa’e presu billete mós sa’e, entaun pasajeiru barak mak lakohi sa’e aviaun,” nia dehan.
Enkuantu oráriu viajen husi Dili ba Xiamen (Xina) iha loron tersa ho durasaun oras lima ho balun, rute fila-fali husi Xiamen-Dili iha loron kuarta, kona-ba presu billete depende klase (promo, full, fare).
Jornalista : Alexandra da Costa
Editór : Cancio Ximenes
